ເຈົ້າໜ້າທີ່​ຈະ​ເພີ່ມ​ມາດ​ຕະການ​ເຂັ້ມ​ງວດ​ຕໍ່​ຜູ້​ຂັບ​ຂີ່ຕຳ​ແລ້ວໜີ

ໃນ​ລະຫວ່າງ​​ກອງ​ປະຊຸມ​ສະຫລຸບ​ວຽກງານ​ປະຈຳ​ປີຂອງ​ກົມ​ຕຳຫລວດ​ຈະລາຈອນ​ ເມື່ອບໍ່ດົນ​ມານີ້​ໃຫ້​ຮູ້​ວ່າ: ​ໃນຕໍ່ໜ້າ, ຄະນະ​ກົມ​ຕຳຫລວດ​ຈະລາຈອນຈະ​ສືບຕໍ່ຊີ້ນຳ-ນຳພາ​ວຽກງານ​ຈະລາຈອນ​ໃຫ້​ມີ​ປະສິດທິພາບ​ກວ່າ​ເກົ່າ ​ເປັນ​ຕົ້ນ​ແມ່ນ​ການລົງ​ກວດກາ​ລະບຽບການ​ສັນຈອນ​ຕາມ​ເສັ້ນທາງ​ຫລວງ​ຕ່າງໆ ເພື່ອ​ແນະ​ນຳ​​ໃຫ້ຜູ້​ໃຊ້​ລົດ-​ໃຊ້​ຖະໜົນມີ​ສະຕິ​ຕໍ່​ການ​ເຄົາລົບ​​ລະບຽບຈະລາຈອນ​ໃຫ້​ເຂັ້ມ​ງວດ, ​ແນ​ໃສ່​ຕ້ານ ​ແລະ ສະກັດ​ກັ້ນ​ການ​ເກີດ​ອຸປະຕິ​ເຫດ ​ແລະ ພວກ​ກໍ່ອາດຊະຍາ​ກຳ​ທາງ​ຖະໜົນ, ກວດກາ​ຈັບ​ຄວາມ​ໄວ, ກວດ​ທາ​ເຫລົ້າ​​ຜູ້​ຂັບ​ຂີ່, ຄວບ​ຄຸມ​ລົດ​ບັນທຸກ​ນ້ຳໜັກ​ເກີນ ​ແລະ ສະພາບ​ເຕັກ​ນິກລົດ​ໃຫ້​ຮັບປະກັນ, ພ້ອມ​ນັ້ນ​ກໍ​ຈະ​ເອົາ​ໃຈ​ໃສ່ກວດກາ​ສະພາບເສັ້ນ​ທາງ, ​ເຄື່ອງໝາຍຈະລາຈອນ​​ໃຫ້​ດີ​ຂຶ້ນກວ່າ​ເກົ່າ​ເພື່ອອໍານວຍ​ຄວາມ​ສະດວກ​ໃຫ້​​ແກ່​ການ​ຈະລາຈອນ ​ແລະ ອື່ນໆ ​ເພື່ອ​ສະກັດ​ກັ້ນ​ການ​ເກີດ​ອຸປະຕິ​ເຫດ​ ເປັນ​ຕົ້ນ​ແມ່ນບັນຫາ​ຕຳ​ແລ້ວໜີ, ​ເຊິ່ງຈະ​ໄດ້​ເພີ່ມ​ມາດ​ຕະການ​ລົງ​ໂທດ​ຢ່າງ​ເຂັ້ມ​ງວດ.
ຜູ້​ລາຍ​ງານ​ຂ່າວ​ໃຫ້​ຮູ້​ວ່າ: ​​ໂດຍ​ສັງ​ເກດ​ແລ້ວ, ​ໃນປັດຈຸບັນການລະ​ເມີດ​ກົດ​ລະບຽບຈະລາຈອນ​​ແມ່ນ​ມີຕົວ​ເລກ​ສູງ​, ຊຶ່ງສະ​ແດງ​ອອກ​ຄື: ​ໃນ​ປີຜ່ານມາ​ພົບ​ເຫັນ​ຜູ້​ລະ​ເມີດຫລາຍ​​ກວ່າ 24 ພັນ​ຄົນ,​ ສ່ວນ​​ໃຫຍ່​ແມ່ນ​ຜູ້ຂັບ​ຂີ່​ດື່ມ​ສິ່ງ​ມືນ​ເມົາ, ຂັບ​ລົດ​ໄວ​ເກີນ​ກຳນົດ, ຊຶ່ງ​ເຈົ້າໜ້າທີ່​ໄດ້​ກັກ​ຕົວມາ​ສຶກສາ​ອົບຮົມ ​ແລະ ດຳ​ເນີນ​ຄະດີ​ຕາມ​ລະບຽບກົດໝາຍ. ​ນອກຈາກ​ນີ້,​ ຄື​ປີຜ່ານມາຢູ່​ທົ່ວ​ປະ​ເທດສະ​ເລ່ຍ​ມື້ໜຶ່ງຈະ​ມີ​ຜູ້​ເສຍ​ຊີວິດ​ຈາກ​ອຸປະຕິ​ເຫດບໍ່ຫລຸດ 3 ຄົນ, ​ຈາກຈຳນວນ​ອຸປະຕິ​ເຫດທີ່​ເກີດ​ຂຶ້ນປະມານ 5.000 ກວ່າ​ກໍລະນີ, ພົ້ນ​ເດັ່ນ​ແມ່ນ​ສະພາບ​ເກີດ​ອຸປະຕິ​ເຫດ​ຕຳ​ແລ້ວໜີ ​ໄດ້​ກາຍເປັນ​ປາກົດ​ການ​ຫຍໍ້​ທໍ້​ໜຶ່ງ, ດັ່ງ​ນັ້ນ​ເພື່ອ​ສະກັດ​ກັ້ນ​ບັນຫາ​ດັ່ງກ່າວ, ກົມ​ຕຳຫລວດ​ຈະລາຈອນ ກຽມອອກ​ແຈ້ງ​ການ​​ໃຫ້​ສັງຄົມ​ມີ​ສ່ວນ​ຮ່ວມ​ໃນ​ການ​ສະກັດ​ກັ້ນ​ການ​ເກີດ​ອຸປະຕິ​ເຫດ, ​ໂດຍ​ສະ​ເພາະ​ແມ່ນ​ຕຳ​ແລ້ວໜີ ຫາກ​ພົບ​ເຫັນ​ແມ່ນ​ໃຫ້​ຖ່າຍ​ວີ​ດີ​ໂອ ຫລື ຮູບ​ພາບ​ເພື່ອ​​ເປັນ​ຫລັກ​ຖານ​ສົ່ງ​ໃຫ້​ເຈົ້າໜ້າທີ່ດຳ​ເນີນ​ຄະດີ, ພ້ອມ​ທັງ​ຈະ​ມີ​ການ​ເພີ່​ມມາດ​ຕະການ​ຢ່າງ​ເຂັ້ມ​ງວດ ຕາມ​ດຳລັດ 188/ນຍ ​ແລະ ຈະ​ຍຶດ​ໃບ​ຂັບ​ຂີ່​ໄວ້ ​ເພື່ອ​​​ໃຫ້​ຜູ້​ກະທຳ​ຜິດ​ໄດ້​ເຂັດຫລາບ.
ຂໍ້ມູນຈາກ: © ShareKao

ใส่ความเห็น

อีเมลของคุณจะไม่แสดงให้คนอื่นเห็น ช่องที่ต้องการถูกทำเครื่องหมาย *

WordPress spam blocked by CleanTalk.