ປີຜ່ານມາລາວສົ່ງອອກຜະລິດຕະພັນພືດບັນລຸຕື້ກວ່າໂດລາສະຫະລັດ

ກະຊວງກະສິກໍາ ແລະ ປ່າໄມ້ ໃຫ້ຮູ້ວ່າ: ໃນປີຜ່ານມາ, ການ​ສົ່ງ​ອອກຜະລິດຕະພັນພືດຂອງປະເທດເຮົາບັນລຸໄດ້ກວ່າຕື້​ໂດ​ລາສະຫະລັດ, ໂດຍສ່ວນໃຫຍ່ແມ່ນສົ່ງໄປຈີນ, ຫວຽດນາມ ແລະ ໄທ. ໃນນັ້ນສົ່ງອອກຫລາຍກວ່າໝູ່ແມ່ນ​ກາ​ເຟມີຈໍານວນ 52 ພັນ​ໂຕນຕົກ​ເປັນ​ມູນ​ຄ່າເກືອບ 100 ລ້ານ​ໂດ​ລາສະຫະລັດ, ຮອງລົງມາແມ່ນປະເພດ​ໝາກ​ໄມ້ໄດ້ 146 ລ້ານ​ໂດ​ລາ, ປະ​ເພດ​ພືດ​ຜັກ​ໄດ້ 30 ລ້ານ​ໂດ​ລາສະ, ​ສາລີ 37 ລ້ານ​ໂດ​ລາ, ​ເຂົ້າ​ປະມານ 10 ລ້ານ​ໂດ​ລາ ແລະ ອື່ນໆ. ສໍາລັບການສົ່ງ​ອອກເຂົ້າ​ໄປ ສປຈີນ ຕາມ​ໂກ​ຕາ 20 ພັນ​ໂຕນຕໍ່ປີນັ້ນ, ມາ​ຮອດ​ປັດຈຸບັນ ​ໄດ້​ສົ່ງໄປ​ແລ້ວ 10.800 ​ໂຕນ ​ແລະ ຈະສົ່ງໄປອີກປະມານ 9.200 ໂຕນ​ຮອດ​ເດືອນ​ມິຖຸນານີ້, ໂດຍແມ່ນບໍລິສັດ ໄອດີພີ (IDP) ​ແລະ ບໍລິສັດ ຊວນ​ເຢ ຂອງຈີນເປັນຜູ້ສົ່ງອອກ ແລະ ມາ​ຮອດ​ປັດຈຸບັນ, ​ໄດ້​ສຳ​ເລັດ​ການ​ອອກ​ເອກະສານ​ກ່ຽວ​ກັບ​ພື້ນທີ່​ໃຫ້ບັນດາ​ບໍລິສັດຜະລິດເຂົ້າຄື: ​ບໍລິສັດ ​ໂຮງສີ​ວາ​ນີດາການ​ຄ້າ ​ແຂວງ​ຄຳ​ມ່ວນ, ບໍລິສັດ ກຳ​ແພງ​ເພັດ ​ແຈ້ງ​ສະຫວ່າງ ​ນະຄອນຫລວງ​ວຽງ​ຈັນ ​ແລະ ສະຫະກອນ​ພັດທະນາ​ກະສິກຳ ​ແຂວງ​ຄຳ​ມ່ວນ, ເຊິ່ງມີພື້ນທີ່​ລວມປະມານ 60.000 ​ເຮັກຕາ ແລະ ​ສາມາດ​ຜະລິດ​ເຂົ້າເພື່ອສົ່ງອອກ​ໄດ້ປະມານ 3-4 ແສນ​ໂຕນຕໍ່ປີ.
ກະຊວງດັ່ງກ່າວ ໃຫ້ຮູ້ວ່າ: ການຜະລິດກະສິກໍາເພື່ອຄໍ້າປະກັນສະບຽງອາຫານ ແລະ ການສົ່ງອອກນັ້ນ, ປັດໃຈຕົ້ນຕໍແມ່ນວຽກງານ​ຊົນລະປະທານ, ໂດຍ​ສະ​ເພາະ​ໃນເຂດ​ຈຸດ​ສຸມ​ການ​ຜະລິດ​ເຂົ້າ. ​ປັດຈຸບັນ, ລະບົບຊົນລະປະທານ​ສາມາດສະໜອງນໍ້າໃຫ້ເນື້ອທີ່ການຜະລິດປະມານ 267 ພັນ​ເຮັກຕາສຳລັບ​ລະດູຝົນ (​ໃນ​ນີ້​ປູກ​ເຂົ້າ 259 ພັນ​ເຮັກຕາ ​ແລະ ພືດ​ 8 ພັນ​ເຮັກຕາ) ​ແລະ ​ລະດູ​ແລ້ງແມ່ນ 156 ພັນ​ເຮັກຕາ (​ປູກ​ເຂົ້າ 90 ພັນ​ເຮັກຕາ ​ແລະ ພືດ 66 ພັນ ​ເຮັກຕາ), ຄຽງ​ຄູ່​ກັນ​ນີ້, ມີລະບົບ​ຊົນລະປະທານປະມານ 40% ​ໄດ້ເກີດການຊໍາລຸດ​​ເປ່​ເພ​ ແລະ ເກີດຄວາມສີ້ນເປືອງໃນການນໍາໃຊ້, ຊຶ່ງ​ເປັນສາ​ເຫດໜຶ່ງພາ ໃຫ້ສະພາບການ​ປູກ​ເຂົ້າມີລັກສະນະຫລຸດ​ລົງໃນ​ແຕ່ລະ​ປີ, ຍ້ອນຕົ້ນທຶນການຜະລິດສູງ.

ใส่ความเห็น

อีเมลของคุณจะไม่แสดงให้คนอื่นเห็น ช่องที่ต้องการถูกทำเครื่องหมาย *

WordPress spam blocked by CleanTalk.