ນັກປັ່ນຈາກອາຊຽນ ຮ່ວມປັ່ນລົດຖີບອາຊຽນໜຶ່ງດຽວ ເພື່ອສັນຕິພາບ

ງານຂີ່ລົດຖີບອາຊຽນໜຶ່ງດຽວ ເພື່ອສັນຕິພາບ ປະຈໍາປີ 2018 ( 1 ASEAN CYCING CLUB ) ດໍາເນີນໄປຢ່າງງາມຕາ ທີ່ເດີ່ນພະທາດຫຼວງ ນະຄອນຫຼວງວຽງຈັນ ໃນຕອນເຊົ້າຂອງວັນທີ 13 ພຶດສະພາ 2018 ທາມກາງນັກປັ່ນຈາກບັນດາປະເທດອາຊຽນ ເຂົ້າຮ່ວມຢ່າງຫຼວງຫຼາຍ.


ສໍາລັບ ເສັ້ນທາງແມ່ນເລີ່ມຈາກຕົ້ນຂະບວນຂີ່ລົດຖີບຈາກ ເດີ່ນພະທາງຫຼວງ-ຖະໜົນໄກສອນ ພົມວິຫານ-ຖະໜົນລ້ານຊ້າງ-ຖະໜົນສາມແສນໄທ-ຖະໜົນເຈົ້າອານຸວົງ-ຖະໜົນເຈົ້າຟ້າງຸ່ມ-ຫໍຄໍາ-ຖະໜົນລ້ານຊ້າງ-ຖະໜົນ 23 ສິງຫາ ແລເະ ເຂົ້າເສັ້ນໄຊ ທີ່ເດີນພະທາງຫຼວງ, ເຊິ່ງຜູ້ທີ່ເຂົ້າຮ່ວມຈະໄດ້ຮັບໃບຢັ້ງຢືນເຂົ້າຮ່ວມການແຂ່ງຂັນ.

“ມາ​ດາມ​ໂບ​” ສານ​ຝັນ​ “ຄຳ​ປານ​” ເດັກ​ຊົນນະບົດ​ ປຸກ​ກະ​ແສ​ບານເຕະ​ລາວ

ປະເທດ​ລາວຂອງພວກເຮົາ​ມີ​ສາວ​ງາມ​ຫລາຍ​ຄວາມ​ສາມາດ​ ຢ່າງ​ “ມາ​ດາມ​ໂບ​” ພິ​ຈິ​ກາ​ ບຸນ​ກວ້າງ​ ທີ່​ເຂົ້າ​ມາປຸກ​ກະ​ແສ​ກີລາ​ບານເຕະ​ຂອງ​ປະເທດ​ລາວ​ ໂດຍ​ນາງ​ດຳ​ລົງ​ຕຳແໜ່ງ​ປະ​ທານ​ວຽງ​ຈັນ​ຢູ​ໄນ​ເຕັດ​ ສະ​ໂມສອນ​ບານເຕະ​ໃນ​ລີກ​ດິ​ວິ​ຊັ່ນ​ 1 ຂອງ​ລາວ​ ແລະ ​ມາ​ດາມ​ໂບ​ເອງ​ກໍ​ເປັນ​ທີ່​ຮູ້​ຈັກ​ເທິງ​ໂລກ​ໂຊ​ຊຽວລາວ​ຢູ່​ແລ້ວ​ ເອີ້ນວ່າ​ເປັນ​ເນັດ​ໄອ​ດໍ້​ຂອງ​ຊາວ​ລາວ​ເລີຍ​ກໍ​ວ່າ​ໄດ້​.


ໂດຍ​ມາ​ດາມ​ໂບ​ໄດ້ຮັບ​ຄວາມ​ສົນ​ໃຈ​ອີກ​ເທື່ອ​ ເມື່ອ​ນາງ​ໄດ້​ມອບ​ໂອ​ກາດ​ໃຫ້​ກັບ​ “ຄຳ​ປານ​ ດວງ​ວິ​ໄລ​” ນັກ​ຮຽນ​ ຊັ້ນ​ ມ.​4 ຊາວ​ເມືອງ​ສະ​ໝ້ວຍ​ ເມືອງ​ຊົນ​ເຜົ່າ​ທີ່​ປະຊາຊົນ​ສ່ວນ​ໃຫຍ່​ຍັງ​ທຸກຍາກ​​ ໃນ​ແຂວງ​ສາ​ລະ​ວັນ​ ຫຼັງ​ຈາກ​ທີ່​ມາ​ດາມ​ໂບ​ໄດ້ຮັບ​ຊົມ​ຄລິບ​ເຕາະ​ບານ​ຂອງ​ຄຳ​ປານ​ ເຊິ່ງ​ມີ​ຊາວ​ເນັດ​ເຂົ້າ​ມາເບິ່ງ​ເປັນ​ຈຳນວນ​ຫລາຍ​


ນາງ​ຈຶ່ງ​ຕິດ​ຕໍ່​ໃຫ້​ຄຳ​ປານ​ເດີນທາງ​ມາ​ສະແດງ​ລີ​ລາ​ການ​ເຕາະ​ບານ​ ເພື່ອ​ເປັນ​ສີ​ສັນ​ເສິກ​ບານເຕະ​ 4 ເສົ້າ​ ໄດ້​ແກ່​ ວຽງ​ຈັນ​​ຢູ​ໄນ​ເຕັດ​, ກອງທັບ​ ເອ​ຟ​ຊີ​, ປກ​ສ​ ເອ​ຟ​ຊີ​ ແລະ ​ມະຫາ​ວິທະຍາ​ໄລແຫ່ງ​ຊາດ​ລາວ​ ທີ່ສະ​ໜາມ​ກີລາ​ເຈົ້າ​ອາ​ນຸວົ​ງ​​ ນະຄອນ​ຫຼວງ​ວຽງ​ຈັນ​​ ເມື່ອ​ຊ່ວງ​ປາຍ​ເດືອນ​ມີ​ນາ​ທີ່​ຜ່ານມາ​ ເຊິ່ງ​ນາງ​ເປັນ​ແມ່​ງານ​ໃຫຍ່​ໃນ​ການ​ຈັດ​ເກມ​ກະ​ຊັບ​ມິດ​ເທື່ອ​ນີ້​ຂຶ້ນ​


ທາງດ້ານ ​ຄຳ​ປານ​ ດວງ​ວິ​ໄລ​ ໄດ້​ຮ່ວມເຝິກ​ຊ້ອມ​ກັບ​ທີມ​ວຽງ​ຈັນ​​ຢູ​ໄນ​ເຕັດ​ ແລະ​ ໄດ້​ໂຊ​​ຄວາມ​ສາມາດ​ການ​ເຕາະ​ບານ​ໃຫ້​ປະຊາຊົນ​ໄດ້ຮັບ​ຊົມ​ ເຊິ່ງ​ເຮັດໃຫ້​ເກີດ​ເປັນ​ກະ​ແສເທິງໂລກ​ອອນ​ລາຍ​​ລາວ​ ທີ່​ໃຫ້​ຄວາມ​ສົນ​ໃຈ​ກັບ​ການ​ແຂ່ງ​ຂັນ​ບານເຕະ​ກະ​ຊັບ​ມິດ​ຫລາຍ​ຂຶ້ນ​ ຖື​ເປັນ​ປະໂຫຍດ​ແກ່ວົ​ງ​ການ​ບານເຕະລາວ​ຢ່າງ​ຍິ່ງ​ ໂດຍ​ທາງ​ຄຳ​ປານ​ກໍ​ໄດ້​ຂອບໃຈ​ມາ​ດາມ​ໂບ​ ທີ່​ໃຫ້​ໂອ​ກາດ​ເດັກ​ບ້ານ​ນອກ​ໄດ້​ລົງ​ຫລິ້ນ​ບານເຕະ​ໃນ​ສ​ະໜາມ​ກີລາ​ລະ​ດັບ​ຊາດ​ ສ່ວນ​ໂຕ​ຄຳ​ປານ​ເອງ​ມີ​ຄວາມ​ຝັນ​ທີ່​ຢາກ​ຈະ​ເປັນ​ນັກ​ເຕະບານ​ທີມ​ຊາດ​ລາວ​


ສຳລັບ​ມາ​ດາມ​ໂບ​ ໄດ້​ເຄີຍ​ຖືກ​ສື່​ນຳ​ມາ​ປຽບທຽບ​ກັບ​ມາ​ດາມ​ແປ້ງ​ ປະທານສະໂມສອນບານເຈະການທ່າເຮືອຂອງປະເທດໄທ ເນື່ອງ​ຈາກ​ນາງ​ງາມ​ ເກັ່ງ​ ແລະ​ ຮັກ​ກີລາ​ບານເຕະ​ຄືກັນ​ ແຕ່​ທາງ​ມາ​ດາມ​ໂບ​ເອງ​ກໍ​ໄດ້​ໃຫ້​ສຳພາດ​ວ່າ​ ຕົນ​ຄົງ​ຈະທຽບ​ກັບ​ມາ​ດາມ​ແປ້ງ​ບໍ່​ໄດ້​ ເພາະ​ການເຮັດ​ທຸລະກິດ​ ແລະ ​ການ​ບໍລິຫານ​ທີມ​ບານເຕະ​ຂອງ​ຕົນ​ ຍັງມີ​ປະສົບການ​ບໍ່​ຫລາຍ​ເທົ່າ​

ແລ່ນ-ລານລາວ ຍາດໄດ້ 1 ຫຼຽນຄຳ 1 ຫຼຽນເງິນ ແລະ 1 ຫຼຽນທອງ ໃນລາຍການ ສິງກະໂປ ໂອເພັນ 2018

ທັບນັກກິລາແລ່ນ-ລານທີມຊາດລາວ ສ້າງຜົນງານໄດ້ຢ່າງໂດດເດັ່ນ ສາມາດຍາດມາໄດ້ 1 ຫຼຽນຄຳ, 1 ຫຼຽນເງິນ ແລະ 1 ຫຼຽນທອງ ລວມ 3 ຫຼຽນ. ໃນນີ້ເດັ່ນທີ່ສຸດແມ່ນນັກກິລາຍິງໜຶ່ງດຽວ ລົດແກ້ວ ອິນທະກຸມມານ ຍາດມາໄດ້ 1 ຫຼຽນຄຳ ແລະ 1 ຫຼຽນເງິນ ເປັນຂອງຂວັນປີໃໝ່ໃຫ້ກັບແຟນພັນແທ້ກິລາລາວ ໃນ​ການ​ເຂົ້າຮ່ວມແຂ່ງຂັນກິລາ​ແລ່ນ-ລານ ລາຍການ ສິງກະໂປ ໂອເພັນ ຄັ້ງທີ 80 ແລະ ຟີລ ແຊມປ້ຽນຊິບ 2018 ຫຼື “80th Singapore Open Track & Field Championships 2018” ທີ່​ປະ​ເທດ​ສິງກະ​ໂປ ​ເປັນ​ເຈົ້າພາບ.

ເມື່ອ​ວັນ​ທີ 12 ເມສາ ຜ່ານ​ມາ ທີ່​ສະໜາມກິລາ​ແຫ່ງ​ຊາດ ປະ​ເທດ​ສິງກະ​ໂປ, ທັບນັກກິລາເເລ່ນ-ລານລາວເຮົາ ລົງແຂ່ງຂັນມື້ສຸດທ້າຍ ໂດຍລາຍການທີ່ໜ້າສົງໃຈທີ່ສຸດຄືການລົງສະໜາມຂອງ ນາງ ລົດແກ້ວ ອິນທະກຸມມານ ​ສາວນັກ​ແລ່ນ​ທົນ​ທີ​ມຊາດ​ລາວ ລາຍການ 1.500 ແມັດຍິງ ແລະ ແລ່ນ 4×100 ແມັດຊາຍ ປະກອບມີ: ທ້າວ ອານຸສອນ ໄຊສາ, ທ້າວ ສີພາສຸກ ບົດວິໄລທອງ, ທ້າວ ສົມສະໜຸກ ບົດວິໄລທອງ ແລະ ອັກສອນສາດ ລາດຊະວົງ. ຜ່ານການເເຂ່ງຂັນ ຜົນປາກົດວ່າ ທັງ 2 ລາຍການ ນັກກິລາລາວເຮົາສາມາດຍາດມາໄດ້ເພີ່ມອີກ 2 ຫຼຽນ ປະກອບມີ: 1 ຫຼຽນເງິນ ຈາກ ນາງ ລົດແກ້ວ ອິນທະກຸມມານ ແລ່ນ 1.500 ແມັດຍິງ ແລະ 1 ຫຼຽນທອງ ຈາກລາຍການ ແລ່ນ 4×100 ແມັດຊາຍ.

ສະຫຼຸບການແຂ່ງຂັນໃນລາຍການນີ້ ທັບນັກກິລາແລ່ນ-ລານທີມຊາດລາວເຮົາ ສາມາດຍາດມາໄດ້ເຖິງ 3 ຫຼຽນ ຄື: 1 ຫຼຽນຄໍາ ເເລະ 1 ຫຼຽນເງິນ ຈາກ ນາງ ລົດເເກ້ວ ອິນທະກຸມມານ ລາຍການ ແລ່ນ 800 ແມັດຍິງ ແລະ 1.500 ແມັດຍິງ. ສ່ວນອີກ 1 ຫຼຽນທອງ ໄດ້ຈາກແລ່ນ 4×100 ແມັດຊາຍ ທ້າວ ອານຸສອນ ໄຊສາ, ທ້າວ ສີພາສຸກ ບົດວິໄລທອງ, ທ້າວ ສົມສະໜຸກ ບົດວິໄລທອງ ເເລະ ອັກສອນສາດ ລາດຊະວົງ.

ການ​ແຂ່ງ​ຂັນ​ກິລາແລ່ນ-ລານ ລາຍການ ສິງກະໂປ ໂອເພັນ ຄັ້ງທີ 80 ແລະ ຟີລ ແຊ໋ມປ້ຽນຊິບ 2018 ຫຼື “80th Singapore Open Track & Field Championships 2018” ທີ່​ປະ​ເທດ​ສິງກະ​ໂປ ​ເປັນ​ເຈົ້າພາບ ​ແມ່ນ​​ແຂ່ງຂັນ​ກັນເປັນເວລາ ​2 ວັນ ລະຫວ່າງ​ວັນ​ທີ 11-12 ເມສາ 2018. ​ໂດຍ ສປປ ລາວ ​ໄດ້​ສົ່ງ​ນັກ​ກິລາ​ເຂົ້າ​ຮ່ວມທັງ​ໝົດ 5 ຄົນ, ຍິງ 1 ຄົນ ລົງ​ແຂ່ງຂັນ 9 ລາຍການ ຈາກ​ທັງ​ໝົດ 36 ລາຍການ ປະກອບ​ມີ ນາງ ລົດແກ້ວ ອິນທະກຸມມານ ແລ່ນ 800 ແມັດຍິງ ແລະ 1.500 ແມັດຍິງ; ທ້າວ ອານຸສອນ ໄຊສາ ແລ່ນຂ້າມຮົ້ວ 110 ແມັດຊາຍ ແລະ ແລ່ນ 4×100 ແມັດຊາຍ; ທ້າວ ອັກສອນສາດ ລາດຊະວົງ ແລ່ນ 100 ແມັດຊາຍ, 200 ແມັດຊາຍ ແລະ ແລ່ນ 4×100 ແມັດຊາຍ; ທ້າວ ສີພາສຸກ ບົວວິໄລທອງ ແລ່ນ 100 ແມັດຊາຍ, 200 ແມັດຊາຍ ແລະ ແລ່ນ 4×100 ແມັດຊາຍ; ທ້າວ ສົມສະໜຸກ ບົວວິໄລທອງ ແລ່ນຂ້າມຮົ້ວ 400 ແມັດຊາຍ ແລະ ແລ່ນ 4×100 ແມັດຊາຍ.

ງານຊ່ວງເຮືອນປະເພນີປະຈຳປີ 2018 ຂອງເມືອງໂພນໄຊ

ງານຊ່ວງເຮືອປະຈຳປີ 2018 ຂອງຊາວເມືອງໂພນໄຊໄດ້ຈັດຂຶ້ນຢ່າງເປັນທາງການໃນວັນທີ 8 ເມສາ ນີ້, ຢູ່ສາຍນ້ຳປາ, ເປັນກຽດເຂົ້າຮ່ວມຂອງ ທ່ານ ສາຍສະໝອນ ຄົມທະວົງ ປະທານສະພາປະຊາຊົນແຂວງຫຼວງພະບາງ, ມີການນຳຂອງແຂວງ-ເມືອງອ້ອມຂ້າງຕະຫຼອດຮອດມວນຊົນຊາວເມືອງໂພນໄຊ, ແຂກທັງພາຍໃນ ແລະ ຕ່າງປະເທດເຂົ້າຮ່ວມຊົມຮ່ວມເຊຍເຮັດໃຫ້ບັນຍາກາດສອງຝັງແມ່ນໍ້າຄຶກຄື້ນມ່ວນຊື່ນ.


ທ່ານ ສີຈັນ ລັດສະໝີ ເຈົ້າເມືອງໆໂພນໄຊ ປະທານຈັດງານກ່າວວ່າ: ການຈັດງານແຂ່ງຂັນຊ່ວງເຮືອ ແມ່ນກິດຈະກຳການທ່ອງທ່ຽວໜື່ງທີ່ຕິດພັນກັບການສົ່ງເສີມວັດທະນະທຳ, ຮີດຄອງປະເພນີ ຂອງປະ ຊາຊົນບັນດາເຜົ່າ ກໍ່ຄືຊາວເມືອງໂພນໄຊ ໃຫ້ຍືນຍົງ ທັງເປັນການພັດທະນາວຽກງານການທ່ອງທ່ຽວຢູ່ເມືອງໂພນໄຊ ກໍ່ຄືແຂວງຫຼວງພະບາງ ໃຫ້ສັງຄົມໄດ້ຮັບຮູ້ ແລະ ເຂົ້າມາທ່ຽວຊົມເມືອງໂພນໄຊ ໃຫ້ຫຼາຍຂຶ້ນ.


ງານຊ່ວງເຮືອໃນຄັ້ງນີ້ ມີເຮືອຊ່ວງທີ່ບັນຈຸສີພາຍບໍ່ເກີນ 16 ສີພາຍ, ທີ່ມາຈາກຫ້ອງການ, ກົມກອງ, ບໍລິສັດ, ເມືອງອ້ອມຂ້າງ ແລະ ບັນດາບ້ານພາຍໃນເມືອງໂພນໄຊເຂົ້າຮ່ວມແຂ່ງຂັນມີທັງໝົດ 29 ລໍາ, ໃນນັ້ນເຮືອຊ່ວງເພດຊາຍມີ 21 ລໍາ ແລະ ເພດຍິງ 8 ລໍາ, ຜ່ານການແຂ່ງຂັນເປັນເວລາ 1 ວັນ, ຜົນປະກົດວ່າເຮືອຊ່ວງເພດຊາຍ ອັນດັບທີ່ 1 ໄດ້ແກ່ ເຮືອຊ່ວງກຸ່ມກະຕ່າງສະເລື່ອງ, ໄດ້ຮັບຂັນເງິນ 1 ໜ່ວຍ ພ້ອມດ້ວຍເງິນສົດ 3 ລ້ານກີບ, ທີ 2 ເຮືອຊ່ວງອົງການຈັດຕັ້ງມະຫາຊົນ ໄດ້ຮັບຂັນ 1 ໜ່ວຍ ພ້ອມເງິນສົດ 2 ລ້ານກີບ, ທີ 3 ເຮືອຊ່ວງຫ້ອງການສາທາລະນະສຸກ ໄດ້ຮັບເງິນສົດ 1 ລ້ານກີບ, ສ່ວນອັນດັບທີ 4 ຮອດທີສຸດທ້າຍໄດ້ຮັບລາງວັນຊົມເຊີຍເປັນເງິນສົດລຳລະ 8 ແສນກີບ, ສຳລັບເຮືອຊ່ວງເພດຍິງ ທີ 1 ແມ່ນເຮືອຊ່ວງບ້ານປາກງາ, ໄດ້ຮັບຂັນ 1 ໜ່ວຍ, ພ້ອມເງິນສົດ 2 ລ້ານກີບ, ທີ 2 ເຮືອຊ່ວງບ້ານທ່າໂພ, ໄດ້ຮັບຂັນ 1 ໜ່ວຍ ພ້ອມເງິນສົດ 1 ລ້ານກີບ, ທີ່ 3 ເຮືອຊ່ວງຫ້ອງການກະສິກຳເມືອງ ໄດ້ຮັບເງິນສົດ 1 ລ້ານກີບ, ສ່ວນອັນດັບທີ 4 ຮອດທີ່ສຸດທ້າຍໄດ້ຮັບລາງວັນຊົມເຊີຍເປັນເງິນສົດລຳລະ 6 ແສນກີບ.

ໄຊນະຄອນ ດາລາແສນ ຜູ້ຮັກສາປະຕູຄົນນີ້ມີດີແນວໃດຈິ່ງເຂົ້າຕາ ລາວໂຕໂຢຕ້າ

ໄຊນະຄອນ ດາລາແສນ ເກີດເມື່ອວັນທີ 13 ທັນວາ 2001, ສູງ 178 ຊັງຕີແມັດ ແລະ ໜັກ 60 ກິໂລກຣາມ ເກີດທີ່ບ້ານຫາດຊາຍຂາວ ເມືອງຫາດຊາຍຟອງ ນະຄອນຫຼວງວຽງຈັນ ເປັນລູກຂອງ ທ້າວ ບຸນມີ ທອງດີ ແລະ ນາງ ແສງມະນີ ດາລາແສນ ມີອ້າຍນ້ອງນຳກັນ 4 ຄົນ ແລະ ລາວເປັນລູກຫຼ້າ.

ປັດຈຸບັນຫຼິ້ນໃຫ້ກັບທີມຊາດລາວ ຮຸ່ນ 18 ປີ ເຊິ່ງກ່ອນໜ້ານັ້ນທີ່ເລີ່ມຕົ້ນເສັ້ນທາງນັກເຕະອາຊີບຈາກນັກເຕະເຍົາວະຊົນຂອງທີມ ວຽງຈັນ ອະຄາເດມີ ເຊິ່ງແມ່ນ ອະຄາເດມີ ຂອງ ອາຈານ ບຸນລັບ ເຄນກິຕິສັກ ຄູຝຶກປະສົບການສູງ ຈົນກ້າວມາສູ່ນັກເຕະອາຊີບຂອງສະໂມສອນຊັ້ນນໍາ ຢ່າງ ລາວໂຕໂຢຕາ ເອັຟຊີ.

ໄຊນະຄອນ ( ໂຈອີ້ ) ໃຫ້ສໍາພາດວ່າ: ກ່ອນທີ່ຈະມາຫຼິ້ນບານເຕະນີ້ແມ່ນຕົນເອງມີຄວາມຮັກມັກໃນການຫຼິ້ນກີລາເປັນທີ່ສຸດ ໂດຍສະເພາະແມ່ນກີລາບານເຕະ, ຫຼິ້ນຢູ່ຕາມແຖວບ້ານຂອງຕົນເອງ ແລະ ແຖວໂຮງຮຽນ ຕັ້ງແຕ່ຍັງເປັນເດັກນ້ອຍສະໄໝຮຽນປະຖົມ ພາຍໃຕ້ການຊັກຊວນຂອງ ໝູ່ເພື່ອນ ແລະ ພໍ່ແມ່ທີ່ຊຸກຍູ້ສົ່ງເສີມມາຕະຫລອດ, ຈົນຮອດສະໄໝຮຽນຢູ່ຊັ້ນປະຖົມ ປໍ 5 ກໍ່ໄດ້ຫຼິ້ນບານເຕະຢ່າງເອົາຈິງເອົາຈັງ ເຊິ່ງເຄີຍໄດ້ໄປຝຶກຊ້ອມກັບທີມ ຄຂປກ ນໍາ ອາຈານ ບຸນລັບ ເຄນກິຕິສັກ ທີ່ປັດຈຸບັນເປັນຜູ້ຝຶກສ້າງເຍົາວະຊົນຮຸ່ນສຶບທອດ ວຽງຈັນ ອະຄາເດມີ.

ສ່ວນເສັ້ນທາງຂອງໃນລະດັບທີມຊາດ ຫຼິ້ນໃນລະດັບທີມຊາດຄັ້ງທໍາອິດໃນຮຸ່ນບໍ່ເກີນອາຍຸ 13 ປີ ແລະ ກໍ່ສ້າງຜົນງານໄດ້ດີພໍສົມຄວນຈົນສາມາດຕິດທີມຊາດ ແລະ ໄດ້ຮັບໂອກາດລົງສະຫນາມຕົວຈິງມາຕະຫຼອດ ຮຸ່ນ ອາຍຸບໍ່ເກີນ 14, 16 ແລະ 18 ປິ ເຊິ່ງເຄີຍໄປຮ່ວມການແຂ່ງຂັນບານເຕະເຍົາວະຊົນລະດັບອາຊີທີ່ປະເທດຍີ່ປຸ່ນ ໃນປີ 2014 ເຊິ່ງໄດ້ອັນດັບ 3 ພາຍໃຕ້ການຄຸມທີມ ຂອງ ທ່ານ ໄກສອນ ໄຊຍະວົງ ຄູຝຶກສະໂມສອນ ກອງທັບ.

ຂະນະທີ່ເສັ້ນທາງໃນເລີ່ມຕົ້ນໃນ ລາວພຣີເມຍລີກ ລາວໄດ້ຫຼິ້ນໃຫ້ກັບສະໂມສອນ ລາວໂຕຢ້າ ເອັຟຊີ ໃນປີ 2017 ໄດ້ລົງສະຫນາມນັດດຽວ ໃນນັດວັນທີ 26 ກໍລະກົດ 2017 ລາວໂຕໂຢຕ້າ ເອັຟຊີ ສະເຫມີ ທິບ ສະຫວັນ ເອັຟຊີ 3-3 ແລະ ການແຂ່ງຂັນບານເຕະ ເປບຊີ ລາວພຣີເມຍລີກ 2018 ໄຊນະຄອນ ດາລາແສນ ແມ່ນໄດ້ຮັບໂອກາດລົງສະຫນາມ ນັດທຳອິດ ວັນທີ 31 ມີນາ 2018 ລາວໂຕໂຢຕ້າ ສາມາດເອົາ ຊະນະ ຊ້າງນ້ອຍ 2-0 ເຊິ່ງເຈົ້າໂຕສາມາດປ້ອງກັນປະຕູບໍ່ໃຫ້ທີມເສຍປະຕູຫລາຍຄັ້ງ .
ຄວາມໄຝ່ຝັນ ໂຈອີ້ ແມ່ນ ຢາກຕິດທີມຊາດລາວ ຊຸດໃຫຍ່ ໃນອະນາຄົດ .


ຂ່າວໂດຍ : MEEARSENAL

ເປີດຢ່າງເປັນທາງການງານກິລາກາຍຍະກຳກອງທັບເຂດ 2 ພາກເໜືອທີ່ແຂວງໄຊຍະບູລີເປັນເຈົ້າພາບ

ງານກິລາກາຍຍະກຳເຂດ 2 ພາກເໜືອທີ່ແຂວງໄຊຍະບູລີ ເປັນເຈົ້າພາບໄດ້ໄຂຂຶ້ນຢ່າງເປັນທາງການ,ໃນວັນທີ 28 ມີນາ 2018 ນີ້ຢູ່ທີ່ເດີນກິລາທະຫານແຂວງໄຊຍະບູລີ, ໃຫ້ກຽດເຂົ້າຮ່ວມຂອງທ່ານ ພົຕ ຈັນທອງ ສອນຕະອາດ ຄະນະພັກກະຊວງປ້ອງກັນປະເທດ ຮອງກົມໃຫ່ຍເສນາທິການກອງທັບ, ມີທ່ານ ເພັງນິລັນ ຄຳພັນເພັງ ຮອງເຈົ້າແຂວງ ໄຊຍະບູລີ ປທານຈັດງານການແຂ່ງກິລາເຂດ2, ມີການນຳຂອງກະຊວງປ້ອງກັນປະເທດ, ການນຳຂອງແຂວງພ້ອມດ້ວຍນັກກິລາ ແລະ ພະນັກງານນັກຣົບ, ກຳລັງປະກອບອາວຸດທ້ອງຖິ່ນເຂົ້າຮ່ວມ.


ທ່ານ ພັອ ກູດ ພົມມາ ຮອງເລຂາຄະນະພັກ ຫົວໜ້າການທະຫານກອງບັນຊາການ ແຂວງ ໄຊຍະບູລີ, ກ່າວລາຍງານວ່າ:
ການແຂ່ງຂັນກິລາກາຍຍະກຳເຂດ 2 ພາກເໝືອທີ່ແຂວງໄຊຍະບູລີເປັນເຈົ້າພາບ, ມີນັກກິລາຈາກ 2 ກອງບັນຊາການທະຫານແຂວງ ຫຼວງພະບາງ ແລະ ແຂວງ ໄຊຍະບູລີ, ມີ 1 ກອງພົນທະຫານຣາບທີ 2, ມີໂຮງຮຽນນາຍສິບເລກ 1, ໂຮງງານປະສານເຫຼົ່າ ແລະ ໂຮງໝໍບໍລິເວນ 107, ມີນັກກິລາເຂົ້າຮ່ວມທັງໝົດ 460 ກ່ວາສະຫາຍ, ມີຄະນະນຳຄູຝຶກ ແລະ ເຈົ້າໜ້າທີ່ຈັດການແຂ່ງຂັນ 25 ສະຫາຍ, ການແຂ່ງຂັນຄັ້ງນີ້ປະກອບມີ 10 ປະເພດກິລາແຂ່ງຂັນ, ຊິງຂັນລັດຖະມົນຕິກະຊວງປ້ອງກັນປະເທດ, ລວມມີ 13 ລາຍການ, ໃນນີ້ 10 ລາຍການລວມໝູ່ ແລະ 3 ລາຍການບຸກຄົນ ເຊັ່ນ: ບານເຕາະຊາຍມີ 4 ຄະນະ, ບານສົ່ງຊາຍ 5 ຄະນະ, ບານສົ່ງຍິງ 5 ຄະນະ,ກະຕໍ້ທີມດ່ຽວຊາຍມີ 5 ຄະນະ, ເປຕັງທີມປະສົມ 2 ຊາຍ 1 ຍິງມີ 5 ຄະນະ, ກິລານັກຣົບແຂງແຮງ 4 ຄະນະ, ກິລາແລ່ນມ້າງປະກອບອາວຸດ 400 ແມັດມີ 4 ຄະນະ, ກິລາຍິງປຶນອາກາ 2 ບົດ ມີ 4 ຄະນະ, ກິລາຍິງປຶນອາພີເຄ ມີ 4 ຄະນະ ແລະ ກິລາຍິງປຶນສັ້ນ ກາ59 ມີ 6 ຄະນະ, ທ່ານຍັງກ່າວຕື່ມວ່າງານແຂ່ງຂັນໃນຄັ້ງນີ້ເກີດຂຶ້ນໄດ້ຍ້ອນຄວາມຕັດສິນໃຈ ແລະ ການຊີ້ນຳຢ່າງໃຫ້ສິດຈາກຄະນະບໍລິຫານງານພັກແຂວງ, ບັນດາພະແນກການຕ່າງໆຂອງແຂວງ, ນັກທຸລະກິດພໍ່ຄ້າຊາວຂາຍ, ບໍລິສັດຫ້າງຮ້ານ, ບັນດາເມືອງ, ອົງການຈັດຕັ້ງທຸກຂັ້ນຕະຫຼອດຮອດພໍ່ແມ່ປະຊາຊົນບັນດາເຜົ່າທີ່ໄດ້ສະໜັບສະໜູນປະກອບສ່ວນຊ່ວຍເຫຼືອດ້ານວັດຖຸ-ຊັບສິນສິ່ງສຳຄັນກໍ່ແມ່ນບັນດາກົມກອງເຂດ 2 ພາກເໝືອທີ່ໄດ້ຕັດສິນໃຈສົ່ງນັກກິລາຂອງຕົນມາຮ່ວມແຂ່ງຂັນ. ຈຸດປະສົງໃນການແຂງຂັນກິລາຄັ້ງນີ້ກໍ່ເພື່ອຄັດເລືອກນັກກິລາເຂດ2, ຜູ້ທີ່ມີພອນສະຫວັນດີເດັ່ນເຂົ້າຮ່ວມຢູ່ຂັ້ນກະຊວງຈັດຂຶ້ນພ້ອມນີ້ຍັງເປັນການຜູກແໜ້ນຄວາມສາມັກຄີພົບປະແລກປ່ຽນບົດຮຽນນຳກັນດ້ວຍໄມຕີຈິດມິດຕະພາບຮູ້ແພ້, ຮູ້ຊະນະ, ຮູ້ອາໄພຊິ່ງກັນ ແລະ ກັນ.


ຈາກນັ້ນທ່ານເພັງນິລັນ ຄຳພັນເພັງ ຮອງເຈົ້າແຂວງ ໄຊຍະບູລີ ປທານຈັດງານການແຂ່ງກິລາເຂດ2, ໄດ້ກ່າວໄຂການແຂ່ງຂັນກິລາກາຍຍະກຳເຂດທີ 2 ຢ່າງເປັນທາງການ, ການແຂ່ງຂັນກິລາກາຍຍະກຳເຂດທີ 2 ແຂວງ ໄຊຍະບູລີ ເປັນເຈົ້າພາບແມ່ນໄດ້ເລີ່ມແຂ່ງຂັນມາແຕ່ວັນທີ 22 ຮອດວັນທີ 30 ມີນາ 2018ຈຶ່ງຈະສຳເລັດ.

ອິດສາກັນທັງປະເທດ! ຄໍາປານ ເດັກບ້ານນອກນໍ້າຕາຊຶມແລ່ນກອດປະທານສະໂມສອນ ຫຼັງຍິງປະຕູທໍາອິດໃຫ້ກັບທີມ

ຖືວ່າເປັນເລື່ອງໜຶ່ງທີ່ໜ້າອິດສາ ແລະ ພູມໃຈກັນຢ່າງຫຼວງຫຼາຍ ທີ່ບອກໄດ້ເລີຍວ່າ ລາວກາຍເປັນເນັດໄອດໍໄປແລ້ວສໍາລັບ ຄໍາປານ ດວງວິໄລ ອາຍຸ 15 ປີ ຮຽນຢູ່ຊັ້ນມໍ 4 ທີ່ເມືອງສະໝ້ວຍ ແຂວງສາລະວັນ ທີ່ມີ ຄິສເຕຍໂນ ໂຣນັລໂດ ກອງໜ້າເບີ 1 ຂອງໂລກ ເປັນຂວັນໃຈ. ຈົນທ່ານ ນາງ ພິຈິກາ ບຸນກວ້າງ ປະທານສະໂມສອນເຫັນທັກສະນະອັນໂດດເດັ່ນ ຈິ່ງເອີ້ນມາທົດສອບສີຕິນ ແລະ ຫຼ້າສຸດລົງສະໜາມໃຫ້ກັບທີມສາມາດຍິງປະຕູທໍາອິດໃຫ້ກັບ ທີມໄດ້ແລ້ວ ໃນນັດທີ່ເອົາຊະນະ ທີມລາວອໍສະຕຣາ 4-1 ເມື່ອວັນທີ 24 ມີນາ ທີ່ຜ່ານມາ.



ຫຼ້າສຸດ ທ່ານ ນາງ ພິຈິກາ ບຸນກວ້າງ ປະທານສະໂມສອນ ນະຄອນຫຼວງ ຢູໄນເຕັດ ເຈົ້າພາບຈັດການແຂ່ງຂັນບານເຕະ 4 ເສົ້າ ປຶກສາກັບສະໂມສອນທີ່ເຂົ້າຮ່ວມການແຂ່ງຂັນບານເຕະລາຍການນີ້ຢ່າງ ກອງທັບ ເອັຟຊີ ທີ່ຈະເປີດສາກຂຶ້ນໃນວັນທີ 24 ມີນານີ້, ຈິ່ງໄດ້ໃຫ້ໂອກາດ ນັກເຕະໄດ້ມາສະແດງການເດາະບານໃຈງານເປີດລາຍການດັ່ງກ່າວ ທີ່ສະໜາມກິລາເຈົ້າອານຸວົງ ລວມເຖິງຄວາມເປັນໄປໄດ້ໃນການມາຄັດເລຶອກເປັນນັກເຕະຂອງທີມ ພາຍຫຼັງທີ່ ທ້າວ ຄໍາປານ ຂໍມານະຄອນຫຼວງວຽງຈັນ ເພື່ອໂອກາດດັ່ງກ່າວ.
ໂດຍເດັກບ້ານນກຄົນດັ່ງກ່າວ ໄດ້ເດີນທາງມາຮອດ ນະຄອນຫຼວງ ວຽງຈັນ ໃນຕອນເຊົ້າຂອງວັນທີ 22 ມີນາ ທີ່ຜ່ານມາ ເພື່ອມາສະແດງເດາະບານໃນງານເປີດການແຂ່ງຂັນດັ່ງກ່າວ ເຊິ່ງລາວເປີດເຜີຍວ່າ: ນ້ອງມີຄວາມຝັນຢາກຕິດທີມຊາດ ແລະ ໄດ້ມີໂອກາດໄດ້ຄັດເລຶອກເປັນນັກກິລາທີມຊາດຈັກຄັ້ງ ແລະ ຂໍຂອບໃຈ ປະທານສະໂມສອນ ນະຄອນຫຼວງ ຢູໄນເຕັດ ແລະ ກອງທັບ ເອັຟຊີ ທີ່ໃຫ້ໂອກາດນ້ອງໄດ້ມາສະແດງການເດາະບານໃນນະຄອນຫຼວງ. ເຊິ່ງມັນເປັນໂອກາດທີ່ສຸດຍິ່ງໃຫຍ່ສໍາລັບນ້ອງ ແລະ ນ້ອງຈະເຮັດໃຫ້ດີທີ່ສຸດ

ຢ່າງໃດກໍ່ຕາມ, ແອັດມິນນົກ ເຊີນຊວນແຟນໆໄປເບິ່ງ ການແຂ່ງຂັນບານເຕະ 4 ເສົ້າ ທີ່ຈະເປີດສາກຂຶ້ນໃນວັນທີ 24 ມີນານີ້ ທີ່ສະໜາມກິລາເຈົ້າອານຸວົງ ເລີ່ມຕັ້ງແຕ່ເວລາ 16:00 ໂມງ ເພື່ອໄປໃຫ້ກໍາລັງໃຈເດັກບ້ານນອກດັ່ງກ່າວ ເພາະນີ້ຄືໂອກາດຍິງໃຫຍ່ທີ່ສຸດຂອງເດັກບ້ານນອກ ເໝືອນດັ່ງຫຼາຍໆຄັນ ແລະ ອາດເຮັດໃຫ້ຄວາມຝັນຂອງລາວເປັນຈິງກໍ່ເປັນໄດ້

ເອົາໃຈຊ່ວຍ

ເອົາໃຈຊ່ວຍ! ເດັກບ້ານນອກ ຫວັງມີໂອກາດຄັດທີມຊາດລາວ ເອົາ ໂຣນັລໂດ ເປັນໄອດໍ້ ທ້າວ ຄໍາປານ ດວງວິໄລ ອາຍຸ 15 ປີ ຮຽນຢູ່ຊັ້ນມໍ 4 ທີ່ເມືອງສະໝ້ວຍ ແຂວງສາລະວັນ ສ່ວນສູງ 158 ຊັງຕີແມັດ ທີ່ມັກຮັກໃນກິລາບານເຕະ ໂດຍມີ ຄິສເຕຍໂນ ໂຣນັລໂດ ກອງໜ້າເບີ 1 ຂອງໂລກ ເປັນຂວັນໃຈ ແລະ ຮຽນແບບນັກເຕະຄົນນີ້, ເຊິ່ງລາວຫວັງວ່າຈະມີໂອກາດຈັກຄັ້ງໄດ້ມາຄັດເລຶອກເປັນ ນັກເຕະທີມຊາດລາວ ດ້ວຍການໂຊເດາະບານເຫັນແລ້ວບໍ່ທໍາມະດາ.

Posted by Sports update / ອັບເດດກິລາລາວ-ສາກົນ on Sunday, March 18, 2018

ແຂ່ງຂັນຢູ່ທີ່ສະຫນາມກິລາແຫ່ງຊາດຫລັກ 16  ເຂົ້າ​ຊົມ​ຟ​ຣີເດີ້

ກອງ​ເຊຍ ຊາວ ລາວ ພ້ອມ​ ຫລື ຍັງ ທີ່​ຈະ​ໄປ​ເຊຍ ທີມ​ຊາດ​ລາວ ຊຸດ​ໃຫ​ຍ່
​ມີ ການແຂ່ງຂັນບານເຕະນັດມິດຕະພາບ FIFA DAY 2 ນັດ ຈະມີຂຶ້ນ ​ຢູ່ ນະ​ຄອນ​ຫລວງວຽງ​ຈັນ ສ​ປ​ປ​ລາວ
– ວັນທີ 21 ມີນາ 2018
ເວລາ 18:00
ລາວ ພົບ ກຳປູເຈຍ
– ວັນທີ 27 ມີນາ 2018 ເວລາ
18:00
ລາວ ພົບ ບັງກະລາເທດ
ແຂ່ງຂັນຢູ່ທີ່ສະຫນາມກິລາແຫ່ງຊາດຫລັກ 16
ເຂົ້າ​ຊົມ​ຟ​ຣີ

Cr : ສະຫະພັນບານເຕະແຫ່ງຊາດລາວ Lao Football Federation

ຊົມເຊີຍ!! ລົດແກ້ວ ອິນທະກຸມມານ ແລະ ສີສະຫວັດ ທຳມະວົງຈິດ ປ້ອງກັນແຊ້ມ ແລ່ນວຽງຈັນ ຮາຟມາຣາທອນ ນາໆຊາດ 2018

ລົດແກ້ວ ອິນທະກຸມມານ ນັກແລ່ນທິມຊາດລາວ ສາມາດປ້ອງກັນແຊ້ມປະເພດຍິງທົ່ວໄປ ຮາຟມາຣາທອນ 21 ກິໂລແມັດ ດ້ວຍເວລາ 1 ຊົ່ວໂມງ 21 ນາທີ 11.7 ວິນາທີ ເອົາຊະນະ ອາຣາເກ (Aragey) ນັກແລ່ນຈາກເອທິໂອປີ (ເອທິໂອເປຍ) 8 ກວ່ານາທີ, ທີ 3 ນາຕາລີ ໂຄເຊັດ (Nathalie Cochet) ຈາກຝຣັ່ງ ທີ 4 ເປັນນັກແລ່ນຈາກສະຫະລັດອາເມຣິກາ ແລະ ທີ 5 ນັກແລ່ນຈາກຍີ່ປຸ່ນ.

ລົດແກ້ວ ຮັບຂັນແຊ້ມ ພ້ອມເງິນລາງວັນ 5 ລ້ານກີບ, ທີ 2 ໄດ້ຮັບຂັນຮອງຊະນະເລີດ ພ້ອມເງິນລາງວັນ 2 ລ້ານ 5 ແສນກີບ, ທີ 3 ຮັບຂັນລາງວັນພ້ອມເງິນລາງວັນ 1 ລ້ານກີບ.

ຜົນງານ 3 ປີ ຂອງ ລົດແກ້ວ ໃນລາຍການນີ້ ປີ 2016 ໄດ້ທີ 2 ປີ 2017 ໄດ້ທີ 1 ແລະ ປີ 2018 ປ້ອງກັນແຊ້ມຄັ້ງທຳອິດຕາມເປົ້າຫມາຍ.

ສ່ວນ ສີສະຫວັດ ທຳມະວົງຈິດ ອີກຫນຶ່ງນັກແລ່ນທິມຊາດລາວ ສ້າງສະຖິຕິຄອງແຊ້ມລາຍການນີ້ 3 ປີ ຊ້ອນ ໃນປະເພດຊາຍທົ່ວໄປ ມິນິມາຣາທອນ 10,5 ກິໂລແມັດ ເຂົ້າເສັ້ນໄຊເປັນຄົນທຳອິດ ດ້ວຍເວລາ 35 ນາທີ 42.6 ວິນາທີ ເອົາຊະນະອັນດັບທີ 2 ຊ່າວ ໄທຢ້າ (Charles Thaiya) ຈາກເຄັນຢ້າ ເກືອບ 3 ນາທີ, ທີ 3 ລຳພອນ ໄຊຍະທີ ຈາກລາວ, ທີ 4 ຮັກດີ ແພງພັນແສງຈິດ ຈາກລາວ ແລະ ທີ 5 ເປັນອີກຫນຶ່ງນັກກິລາຈາກລາວ ວຽງສະຫວັນ ແກ້ວວົງກົດ.

ລາງວັນຊະນະເລີດ ປະເພດຊາຍທົ່ວໄປ ມິນິມາຣາທອນ 10,5 ກິໂລແມັດ ໄດ້ຮັບຈັນແຊ້ມພ້ອມເງິນລາງວັນ 2 ລ້ານກີບ, ທີ 2 ໄດ້ຮັບຂັນຮອງຊະນະເລີດ ພ້ອມເງິນລາງວັນ 1 ລ້ານ 5 ແສນກີບ, ທີ 3 ຮັບຂັນລາງວັນພ້ອມເງິນລາງວັນ 8 ແສນກີບ.

Photo: Facebook ean-Christophe Olry & Lodkeo Inthakoumman & Souk Malivanh & Perd Sisavat & Lanoi Suthammavong

ມອບ-ຮັບ ຕຳແໜ່ງຜູ້ອຳນວຍການ ສະໜາມກິລາແຫ່ງຊາດ ຫຼັກ 16 ຜູ້ເກົ່າ-ຜູ້ໃໝ່ ຢ່າງເປັນທາງການ

ພິທີມອບ-ຮັບຕຳແໜ່ງດັ່ງກ່າວ ໄດ້ຈັດຂຶ້ນໃນວັນທີ 16 ກຸມພາ ຜ່ານມາ ທີ່ສະໜາມກິລາແຫ່ງຊາດ (ຫຼັກ 16) ນະຄອນຫຼວງວຽງຈັນ, ລະຫວ່າງ ທ່ານ ສີທາ ຈູຢາປະເສີດ ຮັກສາການຜູ້ອຳນວຍການສະໜາມກິລາແຫ່ງຊາດ ທີ່ຮັກສາການແທນ ທ່ານ ຄູນເພັງ ຄຳມັງ ຜູ້ອຳນວຍການສະໜາມກິລາແຫ່ງຊາດ ຄົນເກົ່າ ທີ່ເຂົ້າຮັບເບ້ຍບຳນານໄປແລ້ວ ແລະ ທ່ານ ສຸລິວັນ ເຊີນວິໄລ ຮອງຫົວໜ້າກົມກິລາລະດັບສູງ ທີ່ຍ້າຍໄປເປັນຜູ້ອຳນວຍການສະໜາມກິລາແຫ່ງຊາດ ຜູ້ໃໝ່ ໂດຍໃຫ້ກຽດເຂົ້າຮ່ວມເປັນສັກຂີພິຍານຂອງ ທ່ານ ບົວລານ ສິລິປັນຍາ ຮອງລັດຖະມົນຕີ ກະຊວງສຶກສາທິການ ແລະ ກິລາ, ທ່ານ ແສງພອນ ພົນອາມາດ ຫົວໜ້າກົມກິລາລະດັບສູງ ກະຊວງສຶກສາທິການ ແລະ ກິລາ ແລະ ທ່ານ ນາງ ບົວຄຳ ດາວສະຫວັນ ຮອງຫົວໜ້າກົມຈັດຕັ້ງ ແລະ ພະນັກງານ ກະຊວງສຶກສາທິການ ແລະ ກິລາ, ມີຮອງຫົວໜ້າກົມ, ຫົວໜ້າພະແນກ, ຄະນະອຳນວຍການ, ຫົວໜ້າຂະແໜງ, ພະນັກງານ ແລະ ພາກສ່ວນທີ່ກ່ຽວຂ້ອງ.

ໂອກາດດັ່ງກ່າວ, ທ່ານ ສີທາ ຈູຢາປະເສີດ ໄດ້ກ່າວອຳລາຕຳແໜ່ງ ແລະ ຜ່ານບົດສະຫຼຸບຫຍໍ້ການຈັດຕັ້ງເຄື່ອນໄຫວໄລຍະຜ່ານມາໃຫ້ຮູວ່າ: ສະໜາມກິລາແຫ່ງຊາດ (ຫຼັກ 16) ແມ່ນໄດ້ເລີ່ມກໍ່ສ້າງຂຶ້ນໃນວັນທີ 3 ເມສາ 2007 ເປັນຕົ້ນມາ ດ້ວຍທຶນຂອງລັດຖະບານ ສປປ ລາວ ໂດຍມອບໃຫ້ກຸ່ມບໍລິສັດ ວິສາວະກຳ ຢູນນານ ສປ ຈີນ ເປັນຜູ້ຮັບຜິດຊອບ ໂຄງການກໍ່ສ້າງທັງໝົດ ແລະ ໄດ້ສຳເລັດລົງພ້ອມມອບ-ຮັບ ນຳໃຊ້ຢ່າງເປັນທາງການ ໃນວັນທີ 22 ກັນຍາ 2009 ໂດຍພາຍໃຕ້ການຄຸ້ມຄອງຂອງຄະນະກຳມະການກິລາ-ກາຍະກຳແຫ່ງຊາດ (ຄກຊ) ໃນເມື່ອກ່ອນ ເພື່ອກະກຽມ ແລະ ຮອງຮັບໃຫ້ແກ່ງານມະຫາກຳກິລາຊີເກມ ຄັ້ງທີ 25 ປີ 2009 ທີ່ສປປ ລາວເຮົາ ໄດ້ຮັບກຽດເປັນເຈົ້າພາບ ເຊິ່ງລວມມີເນື້ອທີ່ທັງໝົດ 125 ເຮັກຕາ ປະກອບມີສະໜາມແຂ່ງຂັນກິລາປະເພດຕ່າງໆ ປະກອບມີ: ສະໜາມກິລາບານເຕະ 2 ສະໜາມ, ສະໜາມກິລາລອຍນ້ຳ 3 ສະໜາມ, ສະໜາມກິລາເທັນນິສ 1 ສະໜາມ, ສະໜາມກິລາໃນຮົ່ມ I ສະໜາມ (ດອກປີກໄກ່) 1 ສະໜາມ, ສະໜາມກິລາໃນຮົ່ມ II (ບານສົ່ງໃນຮົ່ມ) 1 ສະໜາມ, ສະໜາມກິລາບານສົ່ງຫາດຊາຍ 1 ສະໜາມ, ສະໜາມກິລາຍິງປືນ 1 ສະໜາມ ແລະ ສະໝາມກິລາຍິງທະນູ 1 ສະໜາມ. ສ່ວນການເຄື່ອນໄຫວໄລຍະຜ່ານມາ ພາຍຫຼັງສິ້ນສຸດງານແຂ່ງຂັນກິລາຊີເກມ ຄັ້ງທີ 25 ປີ 2009 ສະໜາມກິລາແຫ່ງຊາດ ໄດ້ຮອງຮັບໃຫ້ແກ່ງານສະເຫຼີມສະຫຼອງນະຄອນຫຼວງວຽງຈັນ ຄົບຮອບ 450 ປີ ໃນປີ 2010 ແລະ ມາຮອດເດືອນມີນາ ປີ 2011 ໄດ້ມີບົດບັນທຶກການມອບ-ຮັບການຄຸ້ມຄອງນຳໃຊ້ສະໜາມກິລາປະເພດຕ່າງໆ ລະຫວ່າງ ຄກຊ ແລະ ບັນດາສະຫະພັນກິລາແຫ່ງຊາດ ປະເພດຕ່າງໆ ເຂົ້າມາຄຸ້ມຄອງ ແລະ ນຳໃຊ້ສະໜາມ, ພ້ອມທັງປົກປັກຮັກສາຊັບສິນຂອງພັກ-ລັດ ທີ່ໄດ້ປະກອບໄວ້ໃຫ້ ຢູ່ໃນແຕ່ສະໜາມ ໃຫ້ຢູ່ໃນສະພາບປົກກະຕິ, ຫຼັກເວັ້ນການຕົກເຮ່ຍເສຍຫາຍ ແລະ ຮັບຜິດຊອບຕໍ່ຄ່າໃຊ້ຈ່າຍບໍລິຫານຕ່າງໆ, ຕະຫຼອດໄລຍະທີ່ໄດ້ມອບໃຫ້ບັນດາສະຫະພັນກິລາແຫ່ງຊາດ ເຂົ້າມາຄຸ້ມຄອງ ແລະ ນຳໃຊ້ສະໜາມ ພວກເຮົາສັງເກດເຫັນວ່າ ບັນດາສະຫະພັນກິລາດັ່ງກ່າວ ແມ່ນບໍ່ສາມາດຮັບພາລະ ໃນການຊຳລະສະສາງຄ່າໄຟຟ້າ, ຄ່ານ້ຳປະປາ, ການປົກປັກຮັກສາ, ການບູລະນະສ້ອມແປງ ຕະຫຼອດຮອດການອະນາໄມຕຶກອາຄານສະຖານທີ່ຕ່າງໆ ເວົ້າລວມ, ເວົ້ສະເພາະແມ່ນເຮັດບໍ່ໄດ້ເທົ່າທີ່ຄວນ ຊ້ຳພັດເປັນການສ້າງໜີ້ສິນຄຸມເຄືອແກ່ຍາວ ຄ້າງຈ່າຍໄວ້ເປັນຈຳນວນຫຼວງຫຼາຍ ໂດຍສະເພາະຄ່າໄຟຟ້າ ແລະ ນ້ຳປະປາ ຈົນມາຮອດປັດຈຸບັນນີ້.

ຂະນະທີ່, ທ່ານ ສຸລິວັນ ເຊີນວິໄລ ກ່າວວ່າ: ສຳລັບແຜນການຈັດຕັ້ງປະຕິບັດວຽກງານໃນຕໍ່ໜ້າ ກໍ່ຄື ແຜນງານ ແລະ ໂຄງການ ແຕ່ນີ້ເຖິງປີ 2022 ໂດຍສະເພາະແຜນວຽກຈຸດສຸມປະຈຳປີ 2018 ທີ່ຈະເລັ່ງໃຫ້ສຳເລັດ ປະກອບມີ: ການອະນາໄມອາຄານສະລອຍນ້ຳ, ສະນ້ຳທັງໝົດ ແລະ ບຳບັດນ້ຳ ໃຫ້ສາມາດນຳໃຊ້ໄດ້ ພ້ອມທັງເປີດບໍລິການໃນເດືອນມີນາ 2018, ຮັບໃຊ້ງານແຂ່ງຂັນກິລາແຫ່ງຊາດ ຄັ້ງ 11 ໃນເດືອນພະຈິກ 2018 ແລະ ການເຝິກສອນນັກກິລາລອຍນ້ຳເຍົາວະຊົນ ພ້ອມທັງຮັບໃຊ້ການເຝິກແອບນັກກິລາທີມຊາດ, ສ້ອມແປງແກ້ໄຂ ລະບົບນ້ຳປະປາ ທີ່ເປ່ເສຍຫາຍ ເພື່ອຮັບປະກັນການໃຊ້ຈ່າຍຄ່າໃຫ້ປະຢັດ ແລະ ໄຟຟ້າແສງສະຫວ່າງພາຍໃນສະໜາມກິລາຈຳນວນໜຶ່ງ, ຕັດຫຍ້າສະໜາມກິລາທັງໝົດ ບົວລະບັດສະໜາມຫຍ້າ ແລະ ສວນດອກໄມ້ໃຫ້ມີສີຂຽວກາຍເປັນສວນສຸຂະພາບ ພ້ອມທັງສາມາດຈັດກິດຈະກຳຕ່າງໆດ້ານກິລາ ເພື່ອສ້າງລາຍຮັບວິຊາການອີກດ້ານໜຶ່ງ ແລະ ຂຶ້ນແຜນປັບປຸງອາຄານສະໜາມກິລາສ່ວນທີ່ເປ່ເພໃຫ້ສາມາດນຳໃຊ້ໄດ້.

ນອກຈາກນັ້ນ, ຍັງມີໂຄງການບຸລິມະສິດ ທີ່ຈະເລັ່ງໄດ້ພ້ອມກັນ ປະກອບມີ ສ້ອມແປງແກ້ໄຂ ລະບົບໄຟຟ້າພາຍໃນສະໜາມກິລາທັງໝົດໃຫ້ມີແສງສະຫວ່າງງາມຕາ ແລະ ປອດໄພ, ສົມທົບກັບບັນດາສະຫະພັນກິລາແຫ່ງຊາດ ທີ່ມີສະໜາມກິລາປະເພດຕ່າງໆ ຮ່ວມສ້າງກິດຈະກຳຈັດການແຂ່ງຂັນເພື່ອພັດທະນາກິລາຂອງຕົນ ແລະ ນຳໃຊ້ສະໜາມໃຫ້ເກີດປະໂຫຍດສູງສຸດ ແລະ ເປີດກ້ວາງການບໍລິການສັງຄົມໃນການສ້າງກິດຈະກຳຕ່າງໆ ເພື່ອສ້າງລາຍຮັບດ້ານວິຊາການໃຫ້ໄດ້ 40 ເປີເຊັນຂອງແຜນງົບປະມານທີ່ໄດ້ຮັບ. ພ້ອມກັບຈະສຸມໃສ່ວຽກງານໃໝ່ຢ່າງຕັ້ງໜ້າ ແລະ ໃຫ້ປະສົບຜົນສຳເລັດ.

ຂ່າວຈາກ: ອໍາໄພວັນ ສູນໂຄສະນາຂ່າວສານ ການສຶກສາ ແລະ ກິລາ