ຫລາຍສາເຫດພາໃຫ້ວຽກງານພັດທະນາຊົນນະບົດ ແລະ ລຶບລ້າງຄວາມທຸກຍາກເດີນໜ້າຊ້າ

ກອງປະຊຸມສະຫລຸບວຽກງານພັດທະນາກະສິກໍາ-ປ່າໄມ້ ແລະ ພັດທະນາຊົນນະບົດປະຈໍາປີ 2017 ເມື່ອບໍ່ດົນມານີ້, ໂດຍການເປັນປະທານຂອງທ່ານລັດຖະມົນຕີກະຊວງກະສິກໍາ ແລະ ປ່າໄມ້ ລຽນ ທິແກ້ວ, ໄດ້ຍົກໃຫ້ເຫັນວ່າ: ປີຜ່ານມາ, ​ສາມາດ​ລຶບລ້າງຄວາມທຸກຍາກ​ໄດ້ 6,546 ຄອບຄົວ, ລື່ນ​ແຜນການ​ເຖິງ 17% (​ແຜນ 5,580 ຄອບຄົວ) ​ແລະ ​​ປັດຈຸບັນ, ຄອບຄົວ​ທຸກ​ຍາກຍັງ​ເຫລືອ​ປະມານ 69,772 ຄອບຄົວ, ຂະນະທີ່ວຽກງານລຶບລ້າງ​ບ້ານ​ທຸກ​ຍາກ​ແມ່ນ​ບໍ່​ສາມາດ​ບັນລຸ​ຕາມ​ແຜນ​ວາງ​ໄວ້ ຄືເຮັດ​ໄດ້​ພຽງ 36 ບ້ານໃນ 178 ບ້ານຂອງແຜນການ ແລະ ບ້ານ​ທຸກ​ຍາກ​ຍັງ​ເຫລືອ 1,653 ບ້ານ.

ສຳລັບ​ບ້ານ​ພັດທະນາ​ແມ່ນ​ສ້າງ​ໄດ້ 81 ບ້ານ, ລື່​ນ​ແຜນການ 3 ບ້ານ. ປັດຈຸບັນມີບ້ານ​ພັດທະນາ​ໃນ​ທົ່ວ​ປະ​ເທດທັງໝົດ 3,917 ບ້ານ. ສ່ວນການ​ສ້າງ​ບ້ານ​ໃຫຍ່​ເປັນ​ຕົວ​ເມືອງ​ນ້ອຍ​ຕາມ​ສີສັນ​ຂອງ​ຊົນນະບົດ​​ປະຕິບັດ​ໄດ້​ພຽງ 3 ບ້ານ​ໃນ​ 8 ບ້ານຂອງແຜນການ ແລະ ມາ​ຮອດ​ປັດຈຸບັນ ​ມີ​ບ້ານ​ໃຫຍ່​ກາຍ​ເປັນ​ຕົວ​ເມືອງ​ນ້ອຍ 31 ບ້ານ​ໃນ​ຄາດໝາຍ​ສູ້​ຊົນ​ວາງ​ໄວ້ 213 ບ້ານ, ​ເຊິ່ງນອນ​ໃນ 107 ​ເມືອງ ​ແລະ 16 ​ແຂວງ.

ແນວໃດກໍຕາມ, ໃນ​ວຽກ​ງານ​ດັ່ງກ່າວໂດຍລວມຍັງເຫັນວ່າຂອດ​ປະສານ​ງານລະຫວ່າງສູນກາງ ​ແລະ ທ້ອງຖິ່ນ ຍັງ​ບໍ່​ທັນ​ກົມກຽວ​ ແລະ ໄປ​ລວງ​ດຽວ​ກັນ, ​ໂດຍ​ສະ​ເພາະ​​ແມ່ນ​ບໍ່​ທັນ​ປະຕິບັດ​ໄດ້​ຕາມ​ເນື້ອ​ໃນ​ຈິດ​ໃຈ​ທີ່​ໄດ້​ກຳນົດ​ໄວ້​ໃນ​ດຳລັດ​ເລກທີ 65/ນຍ, ຍ້ອນ​ບັນຫາການ​ສະຫລຸບ​ປະ​ເມີນ​ຜົນ​ກ່ຽວ​ກັບ​ວຽກ​ພັດທະນາ​ຊົນນະບົດ-ລຶບລ້າງຄວາມທຸກຍາກ ແລະ ການຈັດສັນອາຊີບຄົງທີ່​ບໍ່​ທັນລະອຽດຖືກຕ້ອງຕາມ​ສະພາບຕົວ​ຈິງ ​ແລະ ບັນຫາ​ສຳຄັນ​ແມ່ນ​ບໍ່​ຮູ້​ຢ່າງ​ຊັດ​ເຈນ​ກ່ຽວ​ກັບ​ໝາກຜົນ​ການ​ນຳ​ໃຊ້​ງົບປະມານ ​ແລະ ​ແຫ​ລ່ງທຶນ​ຈາກ​ແຫ​ລ່ງຕ່າງໆ, ​ເຊິ່ງຂະ​ແໜງ​ພັດທະນາ​ຊົນນະບົດ​ຖື​ວ່າ​ມີ​ງົບປະມານ​ຫລາຍ​ກວ່າ​ໝູ່, ​ໂດຍ​ລວມທັງ​ງົບປະມານ​ພາຍ​ໃນ​ສະ​ເພາະ​ຂອງ​ວຽກ​ພັດທະນາ​ຊົນນະບົດ ​ແລະ ງົບປະມານ​ລົງ​ເຂດ​ຊົນນະບົດ​ຂອງ​ທຸກຂະ​ແໜງ​ການ, ຂອງ​ການ​ຊ່ວຍ​ເຫລືອ ​ແລະ ການ​ປະກອບສ່ວນ​ຂອງ​ລະບົບ​ທະນາຄານ​ນະ​ໂຍບາຍ ​ແລະ ທະນາຄານ​ອື່ນໆ, ຊຶ່ງຂະ​ແໜງ​ວຽກ​ພັດທະນາ​ຊົນນະບົດ​ແມ່ນ​ຂະ​ແໜງ​ການ​ທີ່​ທົ່ວ​ພັກ ແລະ ລັດຖະບານຖືເປັນບຸລິມະສິດພິເສດ, ສະນັ້ນໃນຕໍ່ໜ້ານີ້, ພາກສ່ວນກ່ຽວຂ້ອງ​ນັບແຕ່ສູນກາງຮອດທ້ອງຖິ່ນຕ້ອງ​ໄດ້​ເອົາໃຈໃສ່ຈັດຕັ້ງປະຕິບັດວຽກງານດັ່ງກ່າວໃຫ້ມີປະສິດທິຜົນ ແລະ ບັນລຸເປົ້າໝາຍກໍານົດໄວ້.

ແລະໃນໂອກາດໃຫ້ກຽດໂອ້ລົມກອງປະຊຸມດັ່ງກ່າວຂອງທ່ານປະທານປະເທດ ບຸນຍັງ ວໍລະຈິດ ກໍໄດ້ຍົກໃຫ້ເຫັນສະພາບຕົວຈິງຂອງປະຕິບັດວຽກງານໃນໄລຍະຜ່ານມາວ່າ: ເຖິງແມ່ນລວມຍອດຜະລິດຕະພັນພານໃນ (GDP) ຂອງປະເທດເຮົາໄດ້ມີການເພີ່ມຂຶ້ນກໍຕາມ, ແຕ່ເບິ່ງເລິກແລ້ວເຫັນວ່າລາຍຮັບຂອງປະຊາຊົນສ່ວນຫລາຍຍັງຢູ່ໃນລະດັບຕໍ່າ, ໂດຍສະເພາະແມ່ນເຂດຊົນນະບົດຫ່າງໄກສອກຫລີກ.

ຂະນະດຽວກັນ ຕົວເລກຄວາມທຸກຍາກໄດ້ຫລຸດລົງ ແຕ່ການປ່ຽນແປງດ້ານລະດັບຊີວິດການເປັນຢູ່ຂອງປະຊາຊົນຍັງບໍ່ທັນຫັນປ່ຽນຈະແຈ້ງ, ຊຶ່ງສາເຫດຕົ້ນຕໍດ້ານໜຶ່ງທີ່ພາໃຫ້ GDP ເພີ່ມຂຶ້ນແມ່ນມາຈາກການຂາຍຊັບພະຍາກອນທໍາມະຊາດ, ຈາກບັນດາໂຄງການອຸດສະຫະກໍາຂະໜາດໃຫຍ່, ເຊິ່ງໂຄງການເຫລົ່ານີ້ ບໍ່ສາມາດສ້າງວຽກເຮັດງານທໍາ, ສ້າງລາຍຮັບທີ່ໝັ້ນຄົງໃຫ້ແກ່ຊາວກະສິກອນ, ອີກດ້ານໜຶ່ງການຜະລິດກະສິກໍາຂອງຊາວກະສິກອນໃນປະເທດເຮົາ ໂດຍລວມເຫັນວ່າຍັງແມ່ນກະສິກໍາຂະໜາດນ້ອຍ, ຫລ້າຫລັງ, ກະແຈກກະຈາຍ, ຂຶ້ນກັບທໍາມະຊາດເປັນສ່ວນໃຫຍ່, ການຜະລິດມີສະມັດຕະພາບຕໍ່າ, ມູນຄ່າເພີ່ມບໍ່ສູງ, ບໍ່ສາມາດນໍາເອົາລາຍຮັບທີ່ໝັ້ນຄົງມາສູ່ຊາວກະສິກອນ, ເຮັດໃຫ້ການປະກອບອາຊີບ, ການຕັ້ງພູມລໍາເນົາຂອງປະຊາຊົນບໍ່ມີຄວາມໝັ້ນຄົງ, ເມື່ອຊາວກະສິກອນເຊິ່ງກວມສ່ວນຫລາຍຂອງປະຊາກອນໃນປະເທດຍັງທຸກ, ແນ່ນອນປະເທດຊາດພວກເຮົາ ກໍບໍ່ສາມາດມັ່ງຄັ່ງເຂັ້ມແຂງ ແລະ ສີວິໄລໄດ້, ສະນັ້ນມັນຮຽກຮ້ອງໃຫ້ພວກເຮົາເບິ່ງສະພາບຢ່າງພາວະວິໄສແທ້, ບໍ່ຄວນແລ່ນນໍາຕົວເລກ ຫລື ຊື່ນຊົມຜົນງານແບບລວມໆ.

ດັ່ງນັ້ນໃນຕໍ່ໜ້ານີ້, ຂໍໃຫ້ຂະແໜງການກ່ຽວຂ້ອງຕ້ອງຖືເອົາການຊຸກຍູ້ສົ່ງເສີມການຜະລິດກະສິກໍາເປັນວຽກໃຈກາງ ແລະ ເປັນຫົວໃຈຂອງການພັດທະນາ, ທັງຮັບປະກັນຄວາມຍືນຍົງທາງດ້ານເສດຖະກິດ-ສັງຄົມ ແລະ ສະພາບແວດລ້ອມ, ໝາຍວ່າຕ້ອງສ້າງອາຊີບທີ່ໝັ້ນຄົງໃຫ້ປະຊາຊົນໃນເຂດຊົນນະບົດຫ່າງໄກສອກຫລີກ, ດ້ວຍການຊຸກຍູ້ໃຫ້ເຂົາເຈົ້າມີສ່ວນຮ່ວມໃນກິດຈະການຕ່າງໆທີ່ຕິດພັນກັບວຽກງານກະສິກໍາ ແລະ ຂະແໜງການອື່ນໆ, ເພື່ອໃຫ້ເຂົາເຈົ້າເປັນເຈົ້າການໃນການເຂົ້າຮ່ວມການຜະລິດອຸດສະຫະກໍາ, ການປຸງແຕ່ງ, ການບໍລິການ ແລະ ອື່ນໆ, ເພື່ອແນໃສ່ຫລຸດຜ່ອນການຫລັ່ງໄຫລເຂົ້າມາເຮັດວຽກໃນຕົວເມືອງ.

ຂໍຂອບໃຈ

ຂໍ້ມູນ : ໜັງສືພິມລາວພັດທະນາ

10 ປີ ບໍລິສັດພູເບ້ຍມາຍນິງ ມອບພັນທະແກ່ລັດໂດຍກົງເກືອບ 5 ພັນຕື້ກີບ

ບໍລິສັດພູເບ້ຍມາຍນິງ ສະເຫຼີມສະຫຼອງການດຳເນີນ ງານໂຮງງານຜະລິດ-ປຸງແຕ່ງ ທອງ-ຄຳ ພູຄຳ ຄົບຮອບ 10 ປີ ຂອງຕົນຂຶ້ນໃນວັນທີ 15 ພຶດ ສະພານີ້, ທີ່ໂຮງແຮມຄຣາວ ພລາຊາ ນະຄອນຫຼວງວຽງຈັນ ໂດຍການເຂົ້າຮ່ວມຂອງທ່ານ ສອນໄຊ ສີພັນດອນ ຮອງນາ ຍົກລັດຖະມົນຕີ, ມີບັນດາລັດ ຖະມົນຕີ, ຮອງລັດຖະມົນຕີ, ພ້ອມດ້ວຍແຂກຖືກເຊີນເຂົ້າ ຮ່ວມ. ໂຮງງານຜະລິດທອງ-ຄຳ ພູຄຳ ໄດ້ເປີດຢ່າງເປັນທາງ ການໃນວັນທີ 9 ພຶດສະພາ 2008, ໂຮງງານພູຄຳ ແລະ ໂຮງງານບ້ານຫ້ວຍຊາຍ ຂອງ ບໍລິສັດພູເບ້ຍມາຍນິງຮ່ວມ ກັນມີການ ຜະລິດໂລຫະທອງ ຈຳນວນ ທັງໝົດ 690.197 ໂຕນ, ຜະລິດຄຳທັງໝົດຈຳນວນ 1.352.252 ອອນ ແລະ ເງິນ ທັງໝົດ 9.530.722 ອອນ ມາ ຮອດທ້າຍປີ 2017 ການປະ ກອບສ່ວນທາງກົງໃຫ້ແກ່ ສປປ ລາວ ແມ່ນມີປະມານ 623 ລ້ານ ໂດລາ.

ບໍລິສັດຮັບຮູ້ເຖິງຄວາມ ສຳຄັນຂອງການປະກອບ ສ່ວນຕໍ່ລາຍຮັບຂອງລັດຖະ ບານ, ໃນປີ 2017 ລັດຖະບານ ລາວ ໃນນາມຜູ້ຖືຫຸ້ນ 10% ໄດ້ຮັບເງິນປັນຜົນຈຳນວນ 10,5 ລ້ານໂດລາຈາກບໍລິສັດ ພູເບ້ຍມາຍນິງ, ໂຕເລກດັ່ງ ກ່າວ ລວມເຖິງມີເງິນສົດ 3,3 ລ້ານໂດລາ ແລະ ອີກ 2 ລ້ານ ໂດລາ ແມ່ນໄດ້ມອບໃຫ້ລັດ ຖະບານແຫ່ງ ສປປ ລາວ ໃນ ເດືອນເມສາ 2018. ໃນດ້ານການລົງທຶນໃນ ຊັບສິນໂຮງງານຜະລິດ ແລະ ສຳຫຼວດຂຸດຄົ້ນ, ບໍລິສັດພູເບ້ຍ ມາຍນິງ ໄດ້ລົງທຶນປະມານ 1,4 ລ້ານໂດລາ ຢູ່ ສປປ ລາວ.

ນອກຈາກນີ້ ບໍລິສັດ ຍັງໄດ້ລົງ ທຶນໃສ່ການສ້າງຖະໜົນຫົນ ທາງ ແລະ ການບຳລຸງສ້ອມ ແປງເສັ້ນທາງຂົນສົ່ງ ແລະ ເສັ້ນທາງໃນບໍລິເວນໃກ້ກັບ ເຂດດຳເນີນງານຂອງບໍລິສັດ ຈຳນວນຫຼາຍກວ່າ 60 ລ້ານ ໂດລາ, ບໍລິສັດໄດ້ປະກອບ ສ່ວນຢ່າງຫຼວງຫຼາຍໃນການ ພັດທະນາຊຸມຊົນທີ່ຢູ່ໃກ້ເຂດ ດຳເນີນງານ, ບໍລິສັດມີກຳລັງ ແຮງງານເປັນຄົນລາວປະມານ 91% ຂອງກຳລັງແຮງງານທັງ ໝົດ, ຜ່ານມາການຈ້າງງານ ຄົນພາຍໃນ ແລະ ເຂດທ້ອງ ຖິ່ນ ພ້ອມກັບການພັດທະນາ ຊຸມຊົນນັບແຕ່ປີ 2008 ບໍລິ ສັດ ໄດ້ປະກອບສ່ວນເຂົ້າໃນ ຫຼາຍໆໂຄງການພັດທະນາຊຸມ ຊົນ ຊຶ່ງຕົກເປັນຈຳນວນ 4,3 ລ້ານໂດລາ ຊຶ່ງປະກອບມີ 293 ໂຄງການຂະໜາດນ້ອຍທີ່ສຸມ ໃສ່ວຽກງານດ້ານການສຶກສາ, ສາທາລະນະສຸກ, ການພັດທະ ນາດ້ານກະສິກຳ, ການພັດທະ ນາທຸລະກິດຂະໜາດນ້ອຍ, ການເງິນຈຸລະພາກ ແລະ ການ ສ້າງພື້ນຖານໂຄ່ງລ່າງ.

ຂ່າວ+ພາບ: ສຸກສາຄອນ

ນສພ ປະຊາຊົນ

ຂໍ້ຫ້າມສຳລັບຜູ້ດຳເນີນທຸລະກິດກ່ຽວກັບຜະລິດຕະພັນວັດສະດຸກໍ່ສ້າງຢູ່ ສປປ ລາວ

ອີງຕາມຄຳແນະນຳຂອງລັດຖະມົນຕີວ່າການກະຊວງວິທະຍາສາດ ແລະ ເຕັກໂນໂລຊີ ວ່າດ້ວຍຂໍ້ຫ້າມສຳລັບຜູ້ດຳເນີນທຸລະກິດກ່ຽວກັບຜະລິດຕະພັນວັດສະດຸກໍ່ສ້າງຢູ່ ສປປ ລາວ ທີ່ລະບຸຢ່າງລະອຽດໃນກົດໝາຍວ່າດ້ວຍການກໍ່ສ້າງ ສະບັບເລກທີ 05/ສພຊ ລົງວັນທີ 26 ພະຈິກ 2009 ມີດັ່ງນີ້:

  • ຂໍ້ຫ້າມສຳລັບຜູ້ດຳເນີນທຸລະກິດ: ຫ້າມຜູ້ດຳເນີນທຸລະກິດ ມີພຶດຕິກຳດັ່ງນີ້: ຜະລິດ, ປຸງແຕ່ງ, ນຳເຂົ້າ – ສົ່ງອອກ ແລະ ຈຳໜ່າຍຢູ່ ສປປ ລາວ ກ່ຽວກັບຜະລິດຕະພັນວັດສະດຸກໍ່ສ້າງທີ່ນອນຢູ່ໃນລາຍການບັນຊີຜະລິດຕະພັນວັດສະດຸກໍ່ສ້າງທີ່ມີການຄຸ້ມຄອງທີ່ບໍ່ໄດ້ຜ່ານການກວດກາ ແລະ ຢັ້ງຢືນຄຸນນະພາບຈາກກົມມາດຕະຖານ ແລະ ວັດແທກ, ແຂວງ, ນະຄອນຫຼວງ ຕາມການມອບໝາຍ ຫຼື ຕາມການແບ່ງຂັ້ນຄຸ້ມຄອງ; ໂຄສະນາເຜີຍແຜ່ຜະລິດຕະພັນວັດສະດຸກໍ່ສ້າງທີ່ບໍ່ຖືກຕ້ອງຕາມຄວາມຈິງ; ຂັດຂວາງການປະຕິບັດງານຂອງເຈົ້າໜ້າທີ່ໆລົງກວດກາ, ໃຫ້ສິນບົນ ແລະ ສົມຮູ້ຮ່ວມຄິດກັບເຈົ້າໜ້າທີ່ກວດກາຄຸນນະພາບຜະລິດຕະພັນວັດສະດຸກໍ່ສ້າງ, ປອມແປງເອກະສານ ແລະ ໃບຢັ້ງຢືນຕ່າງໆທີ່ກ່ຽວຂ້ອງຂອງຜະລິດຕະພັນວັດສະດຸກໍ່ສ້າງ.
  • ຂໍ້ຫ້າມສຳລັບເຈົ້າໜ້າທີ່ກວດກາຄຸນນະພາບຜະລິດຕະພັນວັດສະດຸກໍ່ສ້າງ: ຂໍ້ຫ້າມສໍາລັບເຈົ້າໜ້າທີ່ໆປະຕິບັດໜ້າທີ່ຮັບຜິດຊອບວຽກງານກວດກາຄຸນນະພາບຜະລິດຕະພັນວັດສະດຸກໍ່ສ້າງ ມີພຶດຕິກຳດັ່ງນີ້:
  • ຜູ້ທີ່ບໍ່ໄດ້ຮັບການແຕ່ງຕັ້ງລົງປະຕິບັດໜ້າທີ່ກວດກາຄຸນນະພາບຜະລິດຕະພັນວັດສະດຸກໍ່ສ້າງ.
  • ປະຕິບັດໜ້າທີ່ໂດຍບໍ່ມີຄວາມຮັບຜິດຊອບ.
  • ປະຕິບັດໜ້າທີ່ໂດຍບໍ່ມີຄວາມຍຸຕິທຳ, ລຳອຽງຕໍ່ບຸກຄົນ, ນິຕິບຸກຄົນ ແລະ ການຈັດຕັ້ງ.
  • ຮັບສິນບົນ ແລະ ສວຍໃຊ້ໜ້າທີ່ເພື່ອຜົນປະໂຫຍດສ່ວນຕົວ.
  • ປອມແປງ, ແກ່ຍາວເວລາ ແລະ ຖ່ວງດຶງເອກະສານການຢັ້ງຢືນຄຸນນະພາບ.
  • ມີພຶດຕິກຳອື່ນທີ່ເປັນການລະເມີດຕໍ່ລະບຽບກົດໝາຍ.
  • ຂໍ້ຫ້າມສຳລັບບຸກຄົນ, ນິຕິບຸກຄົນ ແລະ ການຈັດຕັ້ງອື່ນ: ຂໍ້ຫ້າມສຳລັບບຸກຄົນ, ນິຕິບຸກຄົນ ແລະ ການຈັດຕັ້ງອື່ນ ມີພຶດຕິກຳດັ່ງນີ້:
  • ສວຍໃຊ້ການເຄື່ອນໄຫວວຽກງານການກວດກາຄຸນນະພາບຜະລິດຕະພັນວັດສະດຸກໍ່ສ້າງ ເພື່ອສ້າງອຸປະສັກກີດຂວາງ ແລະ ແຊກແຊງການເຮັດວຽກຂອງເຈົ້າໜ້າທີ່ໆຮັບຜິດຊອບການກວດກາ, ກວດສອບຄຸນນະພາບຜະລິດຕະພັນວັດສະດຸ.
  • ໂຄສະນາ, ສົ່ງເສີມຜະລິດຕະພັນວັດສະດຸກໍ່ສ້າງທີ່ບໍ່ໄດ້ຄຸນນະພາບ.
  • ສ້າງມົນລະພິດຕໍ່ສະພາບແວດລ້ອມ ແລະ ສັງຄົມ.
  • ຊ່ວຍເຫຼືອ, ປົກປ້ອງຜູ້ລະເມີດຂໍ້ຕົກລົງສະບັບນີ້.
  • ປິດບັງ, ເຊື່ອງອຳການກະທຳທີ່ເປັນການລະມີດກົດລະບຽບກົດໝາຍ.
  • ມີພຶດຕິກຳອື່ນທີ່ຜິດກັບລະບຽບກົດໝາຍ.
    [ ຂໍ້ມູນຈາກ: ກົດໝາຍວ່າດ້ວຍການກໍ່ສ້າງ ]ທີ່ມາ :ເສດຖະກິດການຄ້າ

ແຂວງຄຳມ່ວນ ປະຕິບັດຈັດເກັບລາຍຮັບ ປະຈຳງວດ I ປີ 2018 ໄດ້ທັງໝົດ 157 ຕື້ກີບ ເທົ່າກັບ 22,78% ຂອງແຜນການປີ

ການຈັດຕັ້ງປະຕິບັດຈັດເກັບລາຍຮັບຂອງຂະແໜງການເງິນແຂວງຄຳມ່ວນ ປະຈຳງວດ I ປີ 2018 ສາມາດປະຕິບັດໄດ້ທັງໝົດ 157 ຕື້ກີບ ເທົ່າກັບ 22,78% ຂອງແຜນການປີ. ໃນນັ້ນພູດຂອງສູນກາງປະຕິບັດໄດ້ 94,48 ຕື້ກີບ ເທົ່າກັບ 24,44% ທຽບໃສ່ໄລຍະດຽວກັນຂອງປີຜ່ານມາຫຼຸດລົງ 0,25%, ພູດຂອງທ້ອງຖິ່ນປະຕິບັດໄດ້ 62,56 ຕື້ກີບ ເທົ່າກັບ 20,68% ທຽບໃສ່ປີຜ່ານມາເພີ່ມຂຶ້ນ 32,66% ຫຼືເທົ່າກັບ 15,4 ຕື້ກີບ. ສຳລັບພາກສ່ວນລາຍຈ່າຍປະຕິບັດໄດ້ 107,22 ຕື້ກີບ. ໃນນັ້ນໄດ້ແກ້ໄຂເບີກຈ່າຍເງີນເດືອນເປັນບູລິມະສິດໜຶ່ງ ເຊິ່ງມາຮອດປະຈຸບັນສາມາດເບີກຈ່າຍເງິນເດືອນໆ 3/2018 ໃຫ້ແກ່ບັນດາພະແນກການ

ແລະ ເມືອງອ້ອມຂ້າງໄດ້ສຳເລັດ ພ້ອມສືບຕໍ່ການເບີກຈ່າຍເງິນເດືອນໆ 4 ໃຫ້ທັນຕາມກຳນົດ. ສຳລັບທິດທາງແຜນການເຄື່ອນໄຫວວຽກງານການເງິນປະຈຳງວດ II ປີ 2018 ໃນດ້ານລາຍຮັບຈະຕ້ອງ ເພີ່ມທະວີການກວດກາ, ຕິດຕາມການຈັດເກັບລາຍຮັບເຂົ້າງົບປະມານ, ວຽກງານຄຸ້ມຄອງບໍລິການລາຍຮັບຫັນເປັນທັນສະໄໝເທື່ອລະກ້າວ, ຫຼີກລ້ຽງການມອບຮັບເງິນລະຫວ່າງພະນັກງານອາກອນ ແລະ ຜູ້ປະກອບການ, ດຳເນີນການສຳຫຼວດຖານຂໍ້ມູນ ຫົວໜ່ວຍທຸລະກິດ ເພື່ອຍົກລະດັບອາກອນມອບເໝົາໃຫ້ສອດຄ່ອງກັບຄວາມເປັນຈິງ ຂອງການຂາຍສິນຄ້າ ແລະ ການບໍລິການ, ຕິດຕາມ, ກວດກາ, ຕ້ານ ແລະ ສະກັດກັ້ນການຫຼັກລອບໜີພາສີທຸກຮູບແບບ, ຄຸ້ມຄອງການເກັບພາສີອາກອນ ສິນຄ້າປະເພດຍຸດທະສາດເຊັ່ນ: ນ້ຳມັນເຊື້ອໄຟ, ພາຫະນະ ແລະ ຄຸ້ມຄອງການສົ່ງອອກຊັບພະຍາກອນທຳມະຊາດໃຫ້ຮັດກຸມ ເພື່ອຫຼີກເວັ້ນການຮົ່ວໄຫຼ ຫຼື ບໍ່ສອດຄ່ອງກັບລະບຽບກົດໝາຍ ລວມເຖິງແຫຼ່ງລາຍຮັບອື່ນໆ ເຂົ້າສູ່ລະບົບຖານລາຍຮັບທີ່ໝັ້ນຄົງ ເພື່ອຮັບປະກັນການສູ້ຊົນສ້າງລາຍຮັບເຂົ້າງົບປະມານຕາມການມອບໝາຍເກັບລາຍຮັບ ທັງໝົດໃນປີ 2018 ຈຳນວນ 689 ຕື້ກວ່າກີບ ໃຫ້ສຳເລັດຕາມແຜນ.

ກອງປະຊຸມສະຫຼຸບວຽກງານການເງິນປະຈຳງວດ I ແລະ ວາງທິດທາງປະຈຳງວດ II ປີ 2018 ໄດ້ຈັດຂຶ້ນໃນວັນທີ 8 ພຶດສະພາ 2018 ທີ່ພະແນກການເງິນແຂວງ ໂດຍມີທ່ານ ບຸນເລັ່ງ ກຸນອາວົງ ຫົວໜ້າພະແນກການເງິນປະຈຳແຂວງຄຳມ່ວນ, ມີບັນດາທ່ານໃນຄະນະພະແນກ, ຂະແໜງການອ້ອມຂ້າງ, ຫ້ອງການການເງິນປະຈຳ 10 ຕົວເມືອງ ແລະ ພະນັກງານ ຂົງເຂດການເງິນເຂົ້າຮ່ວມ.

ຂ່າວ: ແຂວງຄຳມ່ວນ

ກຸ່ມບໍລິສັດ ໂຄລາວ ຂະຫຍາຍທຸລະກິດສູ່ກຳປູເຈຍ ລົງທຶນເປີດໂຮງງານປະກອບລົດ ແດຮັນ.

ກຸ່ມບໍລິສັດ ໂຄລາວ ໄດ້ເປີດໂຮງງານປະກອບລົດແດຮັນ ຂຶ້ນທີ່ປະເທດກຳປູເຈຍ ໃນວັນທີ 9 ພຶດສະພາ 2018 ເຊິ່ງເປັນການຂະຫຍາຍຖານການຕະຫຼາດສູ່ປະເທດສະມາຊິກອາຊຽນທີ່ສຳຄັນຂອງ ກຸ່ມບໍລິສັດ ໂຄລາວ ໂດຍໃຫ້ກຽດເຂົ້າຮ່ວມຕັດແຖບຜ້າເປີດໂຮງງານຂອງ ທ່ານ ສົມເດັດ ຮຸນເຊັນ ນາຍົກລັດຖະມົນຕີແຫ່ງຣາຊະອານາຈັກກຳປູເຈຍ, ທ່ານ ໂອ ເຊຢັງ ປະທານໃຫຍ່ ກຸ່ມບໍລິສັດໂຄລາວ ພ້ອມດ້ວຍຜູ້ບໍລິຫານເຂົ້າຮ່ວມ.

ໂຮງງານປະກອບລົດ ແດຮັນ ຕັ້ງຢູ່ເຂດເສດຖະກິດ ໃນເມືອງຊອກເອັມເຕດສ ( Chrok Mtes District ) ແຂວງສວາຍຣຽງ ( Svay Rieng Province ) ເຊິ່ງທ່ານສົມເດັດ ຮຸນເຊັນ ໄດ້ໃຫ້ການຍ້ອງຍໍຕໍ່ ກຸ່ມບໍລິສັດ ໂຄລາວ ທີ່ໄດ້ເຂົ້າມາລົງທຶນທີ່ກຳປູເຈຍ ເຊິ່ງໄດ້ປະກອບສ່ວນຊ່ວຍລັດ ຖະບານກຳປູເຈຍ ແກ້ໄຂວຽກເຮັດງານທຳໃຫ້ແກ່ປະຊາ ຊົນກຳປູເຈຍ ຫຼາຍພັນຄົນ.

ພາຍຫຼັງການໂອ້ລົມຂອງທ່ານສົມເດັດ ຮຸນເຊັນ, ທ່ານ ໂອ ເຊຢັງ ປະທານໃຫຍ່ ກຸ່ມບໍລິສັດ ໂຄລາວ ໄດ້ມອບລົດຂົນສົ່ງແຮງງານບັນຈຸໄດ້ 32 ຄົນຕໍ່ຄັນ ໃຫ້ແກ່ລັດຖະບານກຳປູເຈຍ ຈຳນວນ 12 ຄັນ.

ກຸ່ມບໍລິສັດ ໂຄລາວ ໄດ້ສ້າງຕັ້ງຂຶ້ນປີ 1997 ທີ່ ສປປ ລາວ ເບື້ອງຕົ້ນເປັນບໍລິສັດຄ້າຂາຍລົດໃຫຍ່ ແລະ ລົດຈັກ. ຈາກນັ້ນ, ກໍ່ໄດ້ມີການຂະຫຍາຍຕົວຂຶ້ນຢ່າງຕໍ່ເນື່ອງຈາກການຂາຍລົດມືສອງ, ປະກອບລົດຈັກທີ່ເປັນຍີ່ຫໍ້ ໂຄລາວ ຍັງໄດ້ເປີດກວ້າງການຜະລິດໂດຍການສ້າງຕັ້ງໂຮງງານປະກອບລົດຂົນສົ່ງຍີ່ຫໍ້ ແດຮັນ ເຊິ່ງເປັນລົດສັນຊາດລາວ, ເປັນອຸດສາຫະກຳລົດຍົນແຫ່ງທຳອິດໃນປະຫວັດສາດຂອງລາວ. ຜ່ານການດຳເນີນທຸລະກິດຂອງ ກຸ່ມບໍລິສັດ ໂຄລາວ ໄດ້ເປີດ ກວ້າງ ແລະ ຂະຫຍາຍຫຼາຍຂະແໜງການ ເຊັ່ນ: ການຂົນສົ່ງ, ທະນາຄານ, ການກໍ່ສ້າງ, ການຄ້າອຸປະກອນໄຟຟ້າ ແລະ ເຄື່ອງເຟີນີເຈີ ເຫຼົ່ານີ້ເປັນຕົ້ນ.

ຕະຫຼອດໄລຍະ 20 ປີຜ່ານມາ ກຸ່ມບໍລິສັດ ໂຄລາວ ໄດ້ຂະຫຍາຍດ້ານທຸລະກິດຂອງຕົນໄປຫຼາຍປະເທດໃນໂລກ ເຊັ່ນ: ໂກລົມບີ, ອັຟການິດສະຖານ, ປາກິດສະຖານ, ຫວຽດນາມ, ກຳປູເຈຍ ແລະ ມຽນມາ ເປັນຕົ້ນ.

ຂ່າວ-ພາບ: ຂ່າວເສດຖະກິດ-ການຄ້າ

ສະພາການຄ້າ ແລະ ອຸດສາຫະກຳ ແຂວງຈຳປາສັກ ຈັດປະຊຸມ ເພື່ອແລກປ່ຽນບົດຮຽນ ແລະ ຂໍ້ມູນກ່ຽວກັບງານຊິງລາງວັນທຸລະກິດອາຊຽນດີເດັ່ນປີ 2018

ສະພາການຄ້າ ແລະ ອຸດສາຫະກຳ ແຫ່ງຊາດລາວ ຮ່ວມກັບສະພາການຄ້າ ແລະ ອຸດສາຫະກຳ ແຂວງຈຳປາສັກ ຈັດປະຊຸມ ເພື່ອແລກປ່ຽນບົດຮຽນ ແລະ ຂໍ້ມູນກ່ຽວກັບງານຊິງລາງວັນທຸລະກິດອາຊຽນດີເດັ່ນປີ 2018 ງານດັ່ງກ່າວຈັດຂຶ້ນໃນວັນທີ 8 ພຶດສະພາຜ່ານມາ ທີ່ໂຮງແຮມ ຈຳປາສັກແກຣນ ເມືອງປາກເຊ. ສ່ວນລາຍລະອຽດເພີ່ມເຕີມທ່ານສາມາດເຂົ້າໄປເບິ່ງທີ່ເວັບໄຊ www.abalaos.com

ແຫຼ່ງທີ່ມາ: Sangkhane Phachanthavong

ກະສິກຳລາວ ມີທ່າກ້າວຂື້ນໃນປີ 2018 ລັດທະບານລາວພ້ອມດັນເຕັມທີ່

ລັດຖະບານລາວ ຄາດວ່າ ຜົນຜະລິດໃນພາກກະສິກຳ ຈະກວມເອົາ 15.73 ເປີເຊັນ

ຂອງມູນຄ່າຜະລິດຕະພັນລວມພາຍໃນ ຫຼື GDP ຕະຫຼອດປີ 2018 ແລະຈະຂະຫຍາຍຕົວເພີ່ມຂຶ້ນ ໃນອັດຕາສະເລ່ຍ 2.8 ເປີເຊັນ ທຽບໃສ່ປີ 2017.

ທ່ານພວງປະລິສັກ ປະວົງວຽງຄຳ ຮອງລັດຖະມົນຕີ ກະຊວງກະສິກຳ ແລະປ່າໄມ້ຖະແຫລງວ່າ ຄະນະລັດຖະບານລາວ ໄດ້ວາງແຜນການຊຸກຍູ້ການຜະລິດໃນພາກ
ກະສິກຳໃນສົກປີ 2018 ນີ້ ໃຫ້ຂະຫຍາຍຕົວເພີ່ມຂຶ້ນ ໃນອັດຕາສະເລ່ຍ 2.8 ເປີເຊັນທຽບໃສ່ປີ 2017 ຊຶ່ງຈະເຮັດໃຫ້ຜົນຜະລິດໃນພາກກະສິກຳມີສັດສ່ວນຄິດເປັນ15.73 ເປີເຊັນຂອງມູນຄ່າຜະາລິດຕະພັນລວມພາຍໃນ ຫຼື GDP ຂອງລາວ ໃນປີ2018 ທັງນີ້ ກໍເພື່ອເປັນການຮັບປະກັນຄວາມໝັ້ນຄົງດ້ານສະບຽງອາຫານໃຫ້ໄດ້ຢ່າງແທ້ຈິງ ດັ່ງທີ່ທ່ານພວງປະລິສັກ ຢືນຢັນວ່າ:

“ກ່ຽວກັບແຜນ ແລະວຽກຈຸດສຸມດ້ານກະສິກຳ-ປ່າໄມ້ ສຳລັບປີ 2018 ນີ້ກະຊວງກະສິກຳ ແລະປ່າໄມ້ ໄດ້ມີການຊີ້ນຳ ແລະກຳນົດວຽກຈຸດສຸມທີ່ຕ້ອງໄດ້ສຸມໃສ່ ເພື່ອເຮັດໃຫ້ການເຄື່ອນໄຫວວຽກງານໃນທຸກກະຊວງແລະຂະແໜງການ ມີຂະບວນການຟົດຟື້ນ ແລະມີຄວາມຮັບຜິດຊອບສູງໂດຍສືບຕໍ່ໄປຕາມວຽກຈຸດສຸມ ແລະໂຄງການວາງໄວ້ ໃນນີ້ແມ່ນເອົາໃຈ
ໃສ່ ຫັນບັນດາໂຄງການບຸລິມະສິດ ລະດັບຊາດໃຫ້ລະອຽດກວ່າເກົ່າເປັນຕົ້ນແມ່ນໃນໂຄງການສົ່ງເສີມການຜະລິດເປັນສິນຄ້າ ແລະຄ້ຳປະກັນ ຄວາມໝັ້ນຄົງດ້ານສະບຽງອາຫານ.”

ແຕ່ຢ່າງໃດກໍຕາມ ການຜະລິດໃນດ້ານກະສິກຳຂອງລາວ ໃນປີ 2017 ທີ່ຜ່ານມາກໍສາມາດຈັດຕັ້ງປະຕິບັດໄດ້ຕ່ຳກວ່າແຜນການທີ່ວາງໄວ້ ໂດຍສະເພາະ ກໍແມ່ນການຜະລິດເຂົ້າໄດ້ຕ່ຳກວ່າເປົ້າໝາຍທີ່ວາງໄວ້ ເຖິງ 300,000 ໂຕນ ເພາະຜົນ
ກະທົບ ຈາກໄພນ້ຳຖ້ວມ ແລະໄພແຫ້ງແລ້ງໃນປີດຽວກັນ ຊຶ່ງເຮັດໃຫ້ການຜະລິດດ້ານສະບຽງອາຫານ ສາມາດຈັດຕັ້ງປະຕິບັດໄດ້ 85 ເປີເຊັນຂນອງແຜນການປີ.

ທັງນີ້ ອົງການອາຫານ ແລະການກະເສດແຫ່ງສະຫະປະຊາດຊາດ ຫຼື FAO ລະບຸວ່າ ພາຍຸເຊິ່ນກາ ເຮັດໃຫ້ເນື້ອທີ່ນາຂອງກະເສດຕະກອນລາວ ເສຍຫາຍໄປຫຼາຍກວ່າ 37,800 ເຮັກຕາ ສັດລ້ຽງປະເພດງົວ ຄວາຍ ໝູ ແບ້ ແລະສັດປີກອີກວ່າ 23,500ໂຕ ສູນຫາຍໄປ ກັບກະແສນ້ຳ ແລະອື່ນໆ ທີ່ຄິດເປັນຄວາມເສຍຫາຍຫຼາຍກວ່າ 55.5ຕື້ກີບ ທັງກໍຍັງຈະສົ່ງຜົນກະທົບຕໍ່ເປົ້າໝາຍການຜະລິດ ແລະການສົ່ງອອກຜົນຜະລິດກະສິກຳຂອງລາວ ໄປຕ່າງປະເທດອີກດ້ວຍ.

ນອກຈາກນັ້ນ ການປູກເຂົ້າຢູ່ນອກເຂດຊົນລະປະທານ ຍັງມີຄວາມສຽງສູງ ຕໍ່ການປ່ຽນແປງຂອງສະພາບດິນຟ້າອາກາດ ທັງໄພແຫ້ງແລ້ງ ແລະນ້ຳຖ້ວມອີກດ້ວຍ ດັ່ງຈະ
ເຫັນໄດ້ຈາກລະດູແລ້ງຂອງປີ 2017 ທີ່ກະເສດຕະກອນລາວໃນທົ່ວປະເທດ ປູກເຂົ້ານາແຊງໄດ້ໃນເນື້ອທີ່ລວມພຽງ 94,700 ກວ່າເຮັກຕາ ຄິດເປັນ 75 ເປີເຊນ ຂອງແຜນ
ການ ແລະໃນຫຼາຍເຂດ ກໍສາມາດປະຕິບັດໄດ້ພຽງ 35 ເປີເຊັນ ຂອງແຜນການເທົ່ານັ້ນ ໂດຍມີສາເຫດມາຈາກໄພທຳມະຊາດ ທີ່ສົມທົບດ້ວຍການມີລະບົບຄອງຊົນລະປະທານຢ່າງຈຳກັດ ແລະເປ່ເພ ຈຶ່ງເຮັດໃຫ້ກະເສດຕະກອນລາວ ພາກັນຫັນປຽນໄປປູກພືດຊະນິດອື່ນໆ ທີ່ມີລາຄາສູງກວ່າເຂົ້າ.

ແຕ່ຢ່າງໃດກໍຕາມ ສຳລັບໃນປີ 2018 ນີ້ ລັດຖະບານລາວ ກໍໄດ້ວາງແຜນການຊຸກຍູ້ການຜະລິດ ເຂົ້າເພື່ອສົ່ງອອກໄປຕ່າງປະເທດ ໃຫ້ໄດ້ເຖິງ 4 ແສນໂຕນ ດ້ວຍການ
ຂະຫຍາຍເນື້ອທີ່ປູກເຂົ້າໃຫ້ກວ້າງກວ່າ 1 ລ້ານເຮັກຕາ ແລະມີສະມັດຖະພາບສະເລ່ຍ 4.2 ໂຕນຕໍ່ເຮັດຕາ ຊຶ່ງຈະເຮັດໃຫ້ມີຜົນຜະລິດເຂົ້າລວມບໍ່ນ້ອຍກວ່າ 4.22ລ້ານໂຕນ ໃນທົ່ວປະເທດ ທີ່ແບ່ງເປັນຜົນຜະລິດເຂົ້ານາແຊງ 475,600 ໂຕນ ນາປີ3,553,000 ໂຕນ ແລະເຂົ້າໄຮ່ 200,000 ໂຕນ ຕາມລຳດັບ.

ທັງນີ້ ໂດຍຄາດວ່າ ໃນຕະຫຼອດປີ 2018 ປະຊາຊົນລາວ ຈະຕ້ອງການບໍລິໂພກເຂົ້າໃນປະລິມານລວມ ບໍ່ຕ່ຳກວ່າ 2,700,000 ໂຕນ ແລະເກັບໄວ້ໃນຄັງແຮ່ສຸກເສີນ 4
ແສນໂຕນ ນອກຈາກນັ້ນ ກໍຈະຕອບສະໜອງໃຫ້ກັບອຸດສາຫະກຳການແປຮູບ ພາຍໃນ 5-6 ແສນໂຕນ ແລະສົ່ງອອກໄປຕ່າງປະເທດ ໃນປະລິມານລວມ 4 ແສນໂຕນດັ່ງກ່າວ ຫາກແຕ່ວ່າ ການບັນລຸເປົ້າໝາຍໃນຕົວຈິງນັ້ນ ກໍບໍ່ແມ່ນເລື່ອງງ່າຍ ເພາະຜົນຜະລິດເຂົ້າໃນລາວຍັງບໍ່ໄດ້ຄຸນນະພາບຕາມຄວາມຕ້ອງການຂອງຕະຫຼາດໃນຕ່າງປະເທດນັ້ນເອງ.

VOA Laos .-

ຕາຊິງບໍ່ໄດ້ມາດຕະຖານ ນະຄອນຫຼວງປະຕິບັດເຄັ່ງ ແລະ ເຮັດແທ້

ເຈົ້າ​ໜ້າ​ທີ່​ການ​ຄ້າກຳລັງ​ເຂັ້ມ​ງວດ​ກວດກາ​ຊິງ​ຊັ່ງ​ທີ່ບໍ່​ໄດ້​ມາດຕະຖານ​ຕາມ​ທ້ອງ​ຕະຫລາດ​ໃນ​ທົ່ວ​ປະ​ເທດ, ພາຍຫລັງ​ຂໍ້ຕົກລົງສະບັບເລກທີ 0544/ກວຕ ຂອງກະຊວງວິທະຍາສາດ ແລະ ເຕັກໂນໂລຊີ ອອກ​ມາ​ເມື່​ອກາງ​ປີ 2017 ກ່ຽວກັບການຄຸ້ມຄອງຊິງຊັ່ງທຸກປະເພດຢູ່ໃນ ສປປ ລາວ ເພື່ອຄຸ້ມຄອງ, ກວດທຽບ, ຈົດທະບຽນ ແລະ ກວດຄືນຊິງຊັ່ງທີ່ຜະລິດ, ນໍາເຂົ້າ, ສົ່ງອອກ, ນໍາໃຊ້ ແລະ ໃຫ້ການບໍລິການໃນ ສປປ ລາວ ​ໃຫ້​ມີ​​ຄວາມ​ໂປ່​ງ​ໃສ​, ຍຸຕິ​ທຳ ຕໍ່​ການ​ສັ່ງ​ຜ​ອງຊື້​-ຂາຍ​ຕ່າງໆ.

ຂໍ້​ຕົກລົງ​ດັ່ງກ່າວໄດ້ກໍານົດນະໂຍບາຍ, ຫລັກການ, ລະບຽບການ ແລະ ມາດຕະການກ່ຽວກັບການຄຸ້ມຄອງ, ການກວດທຽບ, ສອບທຽບ ແລະ ຈົດທະບຽນ ແລະ ກວດຄືນຊິງຊັ່ງທີ່ຜະລິດ, ນໍາເຂົ້າ, ສົ່ງອອກ, ນໍາໃຊ້ ແລະ ໃຫ້ການບໍລິການຢູ່ ສປປ ລາວ ໃຫ້ມີຄວາມເປັນເອກະພາບ, ບົນພື້ນຖານຄວາມຖືກຕ້ອງ, ຊັດເຈນໃນ​ການຊັ່ງມວນສານຂອງວັດຖຸ ແລະ ສິ່ງຂອງຕ່າງໆ ເພື່ອຊີ້ບອກນ້ຳໜັກເວລາຊື້, ຂາຍ, ແລກປ່ຽນສິນຄ້າ ແລະ ການບໍລິການອື່ນໆ, ເຊິ່ງມີຫົວໜ່ວຍພື້ນຖານການວັດແທກເປັນກິໂລກລາມ​ ແລະ ​ຫັນ​ສູ່ລະບຽບການຂອງພາກພື້ນ ແລະ ສາກົນ.

ລາຍ​ງານ​ຈາກ​ເຈົ້າ​ໜ້າ​ທີ່​ການ​ຄ້ານະຄອນຫລວງ​ວຽງຈັນ ວ່າ: ​ໂດຍ​ປະຕິບັດ​ຕາມ​ເນື້ອ​ໃນ​​​ຂໍ້​ຕົກລົງ​ດັ່ງກ່າວ ກໍ​ໄດ້​ມີ​ການ​ແຕ່ງ​ຕັ້ງ​ໜ່ວຍ​ສະ​ເພາະ​ກິດຂັ້ນ​ນະຄອນຫລວງ, ຂັ້ນ​ເມືອງ ​ເພື່ອ​ຕິດຕາມ​ກວ​ດກ​າລາຄາ​ສິນ​ຄ້າ, ກວ​ດກາ​ຊິງ​ຊັ່ງ​ທີ່​ບໍ່​ໄດ້​ມາດ​ຕະຖານ​ໃນ​ທ້ອງ​ຕະຫຼລາດ ​ແລະ ​ມີ​ຊິງ​ກາງ​ຈາກ​ຄະນະ​ກຳມະການ​ໄວ້​ປະຈຳ​ຕະຫລາດ, ​ໂດຍ​ສະ​ເພາະຕະຫລາດຂົວ​ດິນ, ຫົວ​ຂົວ, ​ໂພນ​ສະຫວ່າງ, ທົ່ງ​ຂັນ​ຄຳ​ ແລະ ​ບ່ອນ​ອື່ນໆ ​ເພື່ອ​ບໍລິການ​ປະຊາຊົນ​ມາ​ຊັ່ງ​ຜອງ​ສິນຄ້າ ​ໃນ​ກໍລະນີ​ສົງ​​​ໄສ​ວ່າ​ໄດ້​ຮັບ​ເຄື່ອງ​ບໍ່​ເຕັມ​ກິ​ໂລ​ຈາກ​ຜູ້​ຂາຍ. ນອກ​ນີ້ກໍ​ໄດ້​ເອົາ​ຊິງທີ່​ຜ່ານ​ການ​ກວດກາ​ແລ້ວ​​ໃຫ້​ຊາວ​ຄ້າຂາຍ​ນຳ​ໃຊ້ ​ແລະ ​ມີ​ບາງ​ຈຳນວນ​ກໍ​ມີ​ການຝ່າ​ຝືນ​ດັດ​ແປງ​ຊິງ, ​ເຊິ່ງ​ໄດ້​ມີ​ການ​ຕັກ​ເຕືອນ ​ແລະ ​ຍຶດ​ເອົາ​ຊິງ​ນັ້ນ​ໄວ້.

ນັກ​ຂ່າວ​ໜັງ​ສື​ພິມ​ລາວ​ພັດທະນາ​ໄດ້​ລົງ​ສຳຫຼວດ​ໃນ​ທ້ອງ​ຕະຫລາດຍັງ​ພົບ​ເຫັນຊາວ​ຄ້າຂາຍບາງ​ຄົນ​​ມີ​ພຶດຕິ​ກຳການ​​ໂກງ​ໃນ​ເວລາຊັ່ງ​ຜອງສິນຄ້າ​, ບາງ​ຄົນມີ​ການ​ດັດ​ແປງຊິງ​ ແລະ ​ບາງ​ຄົນກໍ​ນຳ​ໃຊ້​ຊິງ​ສອງ​ຫນ່ວຍ​ຄື: ​ໃນ​ເວລາເຈົ້າ​ໜ້າ​ທີ່​​ລົງ​​ໄປ​ກວ​ດກາກໍ​ເອົາ​ຊິງບໍ່​ໄດ້​​ຕາມ​ມາດຕະຖານ​ນັ້ນ​ໄປ​ເຊື່​ອງ​ໄວ້, ​ພໍ​​ເຈົ້າ​ໜ້າ​ໜີ​​ໄປ​ແລ້ວ​ກໍ​ເອົາ​ຊິງ​ທີ່​ບໍ່​ໄດ້ມາດຕະຖານນັ້ນ​ຂື້ນ​ມາ​ໃຊ້​ຄື​ເກົ່າ.

ຂໍຂອບໃຈຂໍ້ມູນ : ໜັງສືພິມລາວພັດທະນາ

ການປະກອບສ່ວນຊຸກຍູ້ເສດຖະກິດລາວ ຂອງຂະແໜງການບໍ່ແຮ່ຈະສືບຕໍ່ຫຼຸດລົງໃນອະນາຄົດ

ການປະກອບສ່ວນຊຸກຍູ້ເສດຖະກິດຂອງລາວ ຂອງຂະແໜງບໍ່ແຮ່ຈະສືບຕໍ່ຫຼຸດຕໍ່າລົງໃນຊຸມປີຕໍ່ໜ້າ ເນື່ອງຈາກມີການຄາດການວ່າ ຜົນໄດ້ຮັບຈາກທຸລະກິດທີ່ອີງໃສ່ຊັບພະຍາກອນທຳມະຊາດດັ່ງກ່າວນີ້ຈະຫຼຸດໜ້ອຍລົງ ອີງຕາມການລາຍງານຂອງສະຖາບັນຄົ້ນຄວ້າເສດຖະກິດແຫ່ງຊາດລາວ.

ອີງຕາມການລາຍງານ ຜົນໄດ້້ໜຶ່ງໃນບັນດາຂະແໜງການທີ່ປະກອບສ່ວນຊຸກຍູ້ເສດຖະກິດຂອງປະເທດ ມີການຫຼຸດໜ້ອຍຖອຍລົງຢ່າງຊັດເຈນ. ສະນັ້ນ ຈຶ່ງເຮັດໃຫ້ການປະກອບສ່ວນຊຸກຍູ້ຂອງຂະແໜງການດັ່ງກ່າວນີ້ຫຼຸດຕໍ່າລົງນຳ.

ແນວໃດກໍຕາມ ທາງສະຖາບັນບໍ່ໄດ້ເປີດເຜີຍໂຕຊີ້ວັດທີ່ກ່ຽວຂ້ອງກັບການລາຍງານດັ່ງກ່າວແຕ່ຢ່າງໃດ. ແນວໃດກໍຕາມ ຕາມສະພາບຄວາມເປັນຈິງເຫັນວ່າຂະແໜງການບໍ່ແຮ່ ໂດຍສະເພາະສອງບໍລິສັດໃຫຍ່ທີ່ລົງທຶນໃນລາວ ມີຜົນຜະລິດວັດຖຸດິບທີ່ຫຼຸດໜ້ອຍລົງ. ພ້ອມກັນນັ້ນ ບໍ່ຄຳເຊໂປນ ກໍຄາດວ່າຈະປິດການດຳເນີນການພາຍໃນປີ 2020 ເນື່ອງຈາກແຮ່ທາດໄດ້ໝົດລົງແລ້ວ.

ທັງນີ້ ສະຖາບັນໄດ້ກ່າວວ່າ ເຖິງວ່າກຳລັງຂອງຂະແໜງບໍ່ແຮ່ຈະຫຼຸດລົງ ແຕ່ເສດຖະກິດລາວຈະຍັງຄົງຂະຫຍາຍຕົວ ເນື່ອງຈາກກຳລັງການຊຸກຍູ້ຂອງຂະແໜງຜະລິດໄຟຟ້າ ແລະເຂື່ອນໄຟຟ້າພະລັງງານນໍ້າຈຳນວນຫຼາຍໄດ້ເປີດດຳເນີນການເປັນທີ່ຮຽບຮ້ອຍແລ້ວ ໃນນັ້ນປະກອບມີ ຫົງສາ ລິກໄນ, ນໍ້າອູ 2 ແລະ 5, ເຊກະໝານ 1 ແລະ ນໍ້າມັງ 1.

ນອກຈາກຂະແໜງການພະລັງງານໄຟຟ້າແລ້ວ, ຂະແໜງການກໍ່ສ້າງກໍຈະເປັນອີກໜຶ່ງປັດໄຈສຳຄັນໃນການເສີມຂະຫຍາຍເສດຖະກິດຂອງລາວ ໂດຍໂຄງການທາງລົດໄຟລາວ-ຈີນ ເປັນຫົວໃຈຫຼັກໃນການພັດທະນາຂະແໜງການດັ່ງກ່າວ. ພ້ອມກັນນັ້ນ ຂະແໜງການບໍລິການ ໂດຍສະເພາະການຂາຍຍ່ອຍ ກໍຈະເປັນອີກສ່ວນທີ່ສຳຄັນໃນຊຸກຍູ້ເສດຖະກິດຂອງຊາດ.

ຂໍຂອບໃຈ

ຂໍ້ມູນ : Xinhuanet

ພາບ : Eustaquio Santimano

ລລທ ຫຼວງພະບາງ ປະຕິບັດບໍ່ໄດ້ຕາມແຜນ ຫຼຸດຄາດໝາຍ 12,42%

ໃນໄລຍະຜ່ານມາ ລັດວິສາຫະກິດ ລາວໂທລະຄົມມະນາຄົມ ( ລລທ ) ໄດ້ຍົກສູງວຽກງານບໍລິຫານໃຫ້ຖືກຕ້ອງຕາມລະບຽບກົດໝາຍໃຫ້ມີຄຸນນະພາບ ແລະ ມີປະສິດທິຜົນດີຂຶ້ນເທື່ອລະກ້າວ, ໄດ້ມີການກວດສອບພາຍໃນຢ່າງເປັນປົກກະຕິ, ພັດທະນາລະບົບບໍລິຫານໃຫ້ມີຄຸນນະພາບ ISO 9001 – 2008, ລົງກວດນັບສິນຄ້າ ແລະ ຄັງເງິນສົດຂອງພາກສ່ວນການຕະຫຼາດ ແລະ ບັນຊີການເງິນທຸກໆເດືອນ. ທ່ານ ສຸກສະຫວັດ ມີໄຊ ຮອງອຳນວຍການ ບໍລິສັດລັດວິສະຫະກິດ ລາວໂທລະຄົມມະນາຄົມ ສາຂາຫຼວງພະບາງ ໄດ້ລາຍງານການຈັດຕັ້ງປະຕິບັດວຽກງານໃນໄລຍະຜ່ານມາທາງຄະນະນຳຂອງ ລລທ ໄດ້ເອົາໃຈໃສ່ສຶກສາອົບຮົມການເມືອງແນວຄິດ ໃຫ້ພະນັກງານ ໂດຍການນຳເອົາແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ມະຕິ, ຄຳສັ່ງ ມາເຊື່ອມຊືມໃຫ້ພະນັກງານ ເຮັດໃຫ້ມີແນວຄິດອຸ່ນອ່ຽງ, ທຸນທ່ຽງ.

ອັນພົ້ນເດັ່ນແມ່ນໄດ້ສຸມໃສ່ວຽກງານວິຊາສະເພາະຂອງຕົນເຮັດໃຫ້ວຽກງານມີຜົນສຳເລັດໃນຫຼາຍດ້ານເປັນຕົ້ນແມ່ນດ້ານລາຍຮັບ-ລາຍຈ່າຍ ສາມາດເກັບລາຍຮັບຈາກບັດຕື່ມເງິນໄດ້ທັງໝົດ 88 ຕື້ 832 ລ້ານກວ່າກີບ ຕາມແຜນແມ່ນ 108 ຕື້ 270 ລ້ານກີບ ສົມທຽບໃສ່ແຜນການແມ່ນຫລຸດຄາດໝາຍ 12,42%, ປະຕິບັດລາຍຈ່າຍໄດ້ 38 ຕື້ 397ລ້ານກວ່າກີບ, ກຳໄລ 50 ຕື້ 435 ລ້ານກວ່າກີບ, ພັນທະຖອກໃຫ້ທ້ອງຖິ່ນ 19 ຕື້ 46 ລ້ານກວ່າກີບ, ຖອກພັນທະຄ່າລຸ້ຍຫ້ຽນໃຫ້ສູນກາງ 74 ຕື້ກີບ. ນອກນີ້ແລ້ວຍັງໄດ້ລົງກິດຈະກຳຕ່າງໆໃນງານບຸນສາມາດຂາຍເບີ MBB ໄດ້ 2.573 ເບີ ປະຕິບັດໄດ້ 65,55%, ເບີວິນໂຟນ ( winphone ) 220 ໜ່ວຍ ປະຕິບັດໄດ້ 74,58%.ສຳເລັດວຽກງານໂຄງການເຟສ 25.5 3G ມີ 13 ສະຖານີ, ເຟສ 25.5 4G ມີ 12 ສະຖານີ, ເຟສ 25.6 4Ga ມີ 11 ສະຖານີ ແລະ ເຟສ 25.6 4G ມີ 8 ສະຖານີ, ຕິດຕັ້ງເບສເຂົ້າສະຖານີຢູ່ໂຄງການທາງລົດໄຟໄດ້ 3 ສະຖານີ

ວັນທີ 20 ກຸມພາ 2018 ນີ້, ຢູ່ບໍລິສັດລັດວິສະຫະກິດ ລາວໂທລະຄົມມະນາຄົມ ສາຂາຫຼວງພະບາງ ໄດ້ຈັດກອງປະຊຸມສະຫຼຸບວຽກງານຮອບດ້ານ ປະຈຳປີ 2017 ແລະ ວາງທິດທາງ 2018 ຂຶ້ນຢ່າງເປັນທາງການ ໂດຍການເຂົ້າຮ່ວມຂອງທ່ານ ພູມີ ຄຸນປະເສີດ ຮອງຫົວໜ້າພະແນກໄປສະນີ ໂທລະຄົມມະນາຄົມ ແລະ ການສື່ສານ, ມີອຳນວຍບໍລິສັດລັດວິສະຫະກິດ ລາວໂທລະຄົມມະນາຄົມ ສາຂາຫຼວງພະບາງ ພ້ອມດ້ວຍຄະນະ ແລະ ຄະນະກວດສອບ, ຫົວໜ້າຂະແໜງຕະຫຼອດ, ພະນັກງານລາວໂທລະຄົມທຸກສາຂາໃນທົ່ວແຂວງເຂົ້າ. ຕອນທ້າຍກອງປະຊຸມ ບັນດາຂະແໜງການກໍ່ໄດ້ພ້ອມກັນຈັບມືແຂ່ງຂັນ ເພື່ອພ້ອມກັນປະຕິບັດເປົ້າໝາຍທີວາງໄວ້ໃຫ້ມີຜົນສຳເລັດ.

ພາບ-ຂ່າວ ໂດຍ ໄຊຍະສອນ