ເມືອງແກ່ນທ້າວຈະເປີດປີທ່ອງທ່ຽວ ພ້ອມກັບບຸນນະມັດສະການພະທາດ ມີຫຼາຍກິດຈະກໍາ

ເມືອງແກ່ນທ້າວ ແຂວງໄຊຍະບູລີ ຈະເປີດປີທ່ອງທ່ຽວ ພ້ອມກັບບຸນນະມັດສະການພະທາດທ້າວແກ່ນ-ພະທາດນາງແພງສີ ປະເພນີບຸນເດືອນ 7 (ບຸນພະເຫວດ) ເລີ່ມແຕ່ວັນທີ 23 ພຶດສະພາ 2018 ຈະມີການປະກວດນັກຮ້ອງສຽງດີ ແລະ ການສະແດງສິລະປະ-ວັນນະຄະດີ, ໃນຕອນຄໍ່າວັນທີ 24 ພຶດສະພາ ປະກວດນາງສາວງາມບຸນເດືອນ 7 ແລະ ການສະແດງສິລະປະ-ວັນນະຄະດີ, ວັນທີ 26 ພຶດສະພາ 2018 ພິທີເປີດປີທ່ອງທ່ຽວຂອງເມືອງຢ່າງເປັນທາງການ.

ວັນທີ 27 ພຶດສະພາ 2018 ກົງກັບມື້ຂຶ້ນ 13 ຄໍ່າ ເດືອນ 7 ເປັນມື້ຫ້າງຫາກະກຽມ, ຕົບແຕ່ງເຄື່ອງສັກກາລະບູຊາ, ຕົບແຕ່ງປະດັບປະດາວັດວາອາຮາມໃຫ້ມີຄວາມຈົບງາມ ແລະ ເປັນລະຮຽບຮ້ອຍ, ວັນທີ 28 ພຶດສະພາ 2018 ກົງກັບມື້ຂຶ້ນ 14 ຄໍ່າ ເດືອນ 7 ເຕົ້າໂຮມບຸນ, ຕ້ອນຮັບພະສົງສາມະເນນ, ເຖົ້າແກ່ທີ່ມາຈາກບ້ານຕ່າງໆ, ຮັບກັນສົມໂພດຈາກສັດທາຍາດໂຍມຈາກບ້ານຕ່າງໆ ແລະ ຕອນຄໍ່າຊົມການສະແດງຄອນເສີດ, ໝໍລໍາເລື່ອງ, ວັນທີ 29 ພຶດສະພາ 2018 ກົງກັບມື້ຂຶ້ນ 15 ຄໍ່າ ເດືອນ 7 ພິທີຖວາຍສັງຄະທານແດ່ພະສົງສາມະເນນ, ບາສີສູ່ຂວັນນາກຜູ້ຈະບວດ, ແຫ່ນາກຈາກວັດຈອມແຈ້ງໄປບວດຢູ່ວັດສີພູມ , ເຕົ້າໂຮມຊັ້ນຄົນຕ່າງໆ ເພື່ອໄປເຊີນພະເຫວດສັນດອນ, ຊົມການຈູດບັ້ງໄຟຫາງ, ເລີ່ມພິທີອັນເຊີນພະເຫວດຢ່າງເປັນທາງການ ຈາກນັ້ນເລີ່ມເຄື່ອນຍ້າຍຂະບວນພະເວດເຂົ້າເມືອງ ແລະ ຕອນຄໍ່າຊົມການສະແດງຄອນເສີດ, ໝໍລໍາເລື່ອງ ແລະ ການຈູດບັ້ງໄຟດອກ, ພ້ອມນີ້ ຕະຫຼອດງານບຸນຍັງມີ ຕະຫຼາດນັດວາງສະແດງ ແລະ ຂາຍສິນຄ້າຈາກບ້ານ-ກຸ່ມບ້ານ ບໍລິເວນໃນທົ່ວເມືອງຕື່ມອີກ.

ຂ່າວ: ມ່ວນ

ລວມພາບ ວິຖີຊີວິດຂອງນັກຫາປາ ແລະ ການສ້າງເຄື່ອງມືໃນການຈັບປາ

ມະຫານະທີສີ່ພັນດອນ ວິຖີຊີວິດຂອງນັກຫາປາ ແລະ ການສ້າງເຄື່ອງມືໃນການຈັບປາ

Mekong’s Si Phan Don, Champasak Province – The fisherman’s life and the making of fish trap

Photo: Piyavit Thongsa-Ard

ແຫຼ່ງທ່ອງທ່ຽວຄຳຕື້ແດນງາມ ເມືອງຄົງເຊໂດນ ສາລະວັນ

ໃນຕອນເຊົ້າ ຂອງວັນທີ 11/05/2018 ໄດ້ລົງສຳຫລວດແຫຼ່ງທ່ອງທ່ຽວເພື່ອເກັບກຳຂໍ້ມູນຂັ້ນພື້ນຖານຢູ່ບ້ານຄຳຕື້, ກຸ່ມນາໂນງ,ເມືອງຄົງເຊໂດນ,ແຂວງສາລະວັນ

ໂດຍພາຍໃຕ້ການນຳພາຂອງທ່ານ ສົມໃຈ ອຸ່ນຈິດ ກຳມະການພັກແຂວງ, ຫົວຫນ້າພະແນກຖະແຫລງຂ່າວ ວັດທະນະທຳ ແລະ ທ່ອງທ່ຽວ ແຂວງສາລະວັນ ມີພະນັກງານວິຊາການຈາກແຂວງ ແລະ ເມືອງ ໂດຍການປະສານສົມທົບກັບອຳນາດການປົກຄອງຂັ້ນທ້ອງຖິ່ນ ລົງສຳຫລວດໂຕຈິງ ແລະ ບັນທືກພາບ ໃນການລົງຄັ້ງນີ້ໄດ້ເກັບກຳຂໍ້ມູນຂັ້ນພື້ນຖານໄດ້ດັ່ງນີ້:

(1) ມີທີວທັດທີ່ສວຍສົດງົດງາມ ແລະ ຍັງມີຖ້ຳຂອງອະດີດທ່ານຜູ້ນຳ(ຖ້ຳທ່ານ ໜູຮັກ ພູມສະຫວັນ ເຄີ່ຍອາໃສ່ຢູ່ກ່ອນການປະຕິວັດ)

(2)ມີຝ່າມື້ພູລະຫິດ ແລະ ຖ້ຳຕ່າງໆເປັນຈຳນວນຫລວງຫລາຍ ສິ່ງສຳຄັນແມ່ນຕັ້ງກົງກັນຂ້າມ ກັບແຫຼງທ່ອງທ່ຽວຂອງປະເທດເພື່ອນບ້ານ (ແຫຼ່ງທ່ອງທ່ຽວຝ່າແຕ້ມປະເທດໄທ)

(3) ມີເສັ້ນທາງດິນແດງໄປມາສະດວກ

(4) ມີໄຟຟ້າໃຊ້ ແລະ ຄວາມສະດວກອື່ນໆ ອັນເປັນເງື່ອນໄຂທີ່ຈະສ້າງເປັນແຫຼງທ່ອງທ່ຽວ ໃນອະນາຄົດ.

ພາບ-ຂ່າວ: ຖວທ ເມືອງຄົງເຊໂດນ ສາລະວັນ

ຕາດຄະ (ແຂວງຊຽງຂວາງ) ທ່ານເຄີຍໄປຫຼືຫຍັງ ?


ຢູ່​ລະ​ຫວ່າງ​ເສັ້ນທາງໂພນ​ສະຫວັນຫາ​​ ເມືອງ​ໜອງ​ແຮດ 99 ກິ​ໂລ​ແມັດ, ​​ແລະ ຈາກ​ທາງ​​ເລກ 7 ​ເຂົ້າ​ໄປປະມານ 5 ກິ​ໂລ​ແມັດ, ທ່ານ​ສາມາດ​ພົບ​ເຫັນ​ຕາດ​ຄະ ທີ່​ເປັນຕາ​ດທຳ​ມະ​ຊາດ ​ມີ​ຄວາມ​ສວຍ​ງາມ​ເປັນ​ຢ່າງ​ຍິ່ງ. ພາຍ​ໃນ​ຕາດ​ ປະກອບ​ດ້ວຍ​ຫຼາຍ​ຂັ້ນ. ​ໃນ​ນັ້ນ ຂັ້ນສຸດ​ທ້າຍ​ມີ​ຄວາມ​ສູງປະມານ40​-50 ​ແມັດ. ​

ແຕ່ລະ​ຂັ້ນ ມີ​ຄວາມ​ສວຍ​ງາມ​ ແລະ ສາມາດ​​ຍ່າງ​ໄດ້​ແຕ່​ລຸ່ມຂຶ້ນ​ເທິງ. ຄວາມ​ກ້ວາງ​ຂອງ​ຕາດ​ ປະມານ 40-50 ​ແມັດ. ພາຍ​ໃນ​ຕາດ ​ແລະ ອ້ອມ​ຂ້າງ ​ປະກອບ​ດ້ວຍ​ຕົ້ນ​ໄມ້ ​ແລະ ຊີວະ​ນາໆ​ພັນ​ ທີ່​ອຸດົມສົມບູນ. ຕາດ​ຄະ ​ມີ​ນ້ຳ​ໄຫຼ​ຕະຫຼອດ​ປີ ​ເປັນ​ນ້ຳ​ທີ່​ເກີດ​ຈາກ​ຮູ​ຜາ.

ແຫຼ່ງທ່ອງ​ທ່ຽວ​ແຫ່ງ​ນີ້ ຍັງ​ຈະ​ຕ້ອງ​ໄດ້ຈັດ​ສັນ​ແຫຼ່ງທ່ອງ​ທ່ຽວ​ຄືນ​ໃໝ່, ສ້າງ​ແຫຼ່ງທ່ອງ​ທ່ຽວ​ທີ່​ສາມາດ​ເຊື່ອມ​ຕໍ່​ກັນ ​ເຮັດ​ໃຫ້​ແຫຼ່ງທ່ອງ​ທ່ຽວ​ແຫ່ງ​ນີ້ ຄື​ກັບ​ວ່າ​ບໍ່​ເດີນທາງ​ໄກ​ປານ​ໃດ ​ແລະ ສ້າງ​ສິ່ງ​ຮອງ​ຮັບ​ຕ່າງໆ ​​​ໄວ້ຄອຍ​ບໍລິການ​ນັກ​ທ່ອງ​ທ່ຽວ​ ທີ່​ມາ​ທ່ຽວ​ຊົມ.

ຄົງເຊໂດນຈັດບຸນບັ້ງໄຟ ພ້ອມຫົດສົງພະພູຄົງ ຢ່າງຟົດຟື້ນ


ໃນວັນທີ 5 ພຶດສະພາ 2018 ຜ່ານມາ ເມືອງຄົງເຊໂດນ ແຂວງສາລະວັນ  ໄດ້ຈັດງານບຸນບັ້ງໄຟເຊິ່ງຕິດພັນກັບການຫົດສົງນໍ້າພຣະພູຄົງ ທີ່ ເດີ່ນສາລາຖໍ້າພຣະພູຄົງ. ໂດຍການເປັນປະທານຂອງ ທ່ານ ກໍ່າ ແສງມະນີ ຮອງເລຂາພັກເມືອງ ຫົວໜ້າຄະນະຈັດຕັ້ງເມືອງ ທັງເປັນປະທານຈັດງານບຸນບັ້ງໄຟ, ໃຫ້ກຽດເຂົ້າຮ່ວມຂອງ ທ່ານ ພົນຈັດຕະວາ ພູວຽງ ຫຼ່ຽມມະວົງສາ ຫົວໜ້າກອງບັນຊາການ ປກຊ ແຂວງ, ມີເຈົ້າເມືອງ-ຮອງເຈົ້າເມືອງອ້ອມຂ້າງ ພ້ອມດ້ວຍມວນຊົນເຂົ້າຮ່ວມຊົມ ແລະ ມີບັນຍາກາດຄຶກຄື້ນມ່ວນຊື່ນ.

ແຫຼ່ງທີ່ມາຈາກ:ໜັງສືພິມ“ສາລະວັນ“

ວັດປ່າດ່ານສູງ ຕຳນານຕຸ້ມນົກທາ, ໝາເຫົ່າເຕົ່າ ອີກສະຖານທີ່ທ່ອງທ່ຽວ ເມືອງປາກຊັນ

ເມືອງປາກຊັນ ແຂວງບໍລິຄຳໄຊ ນອກຈາກຈະມີແຫຼ່ງທ່ອງທ່ຽວທາງດ້ານທຳມະຊາດ ແລະ ປະຫວັດຊາດທີ່ໜ້າສົນໃຈຫຼາຍແຫ່ງແລ້ວ ແຫຼ່ງທ່ອງທ່ຽວທາງດານວັດທະນຳທຳກໍ່ມີຄວາມໂດດເດັ່ນບໍ່ແພ້ກັນ ເພາະວ່າປະຊາຊົນຄົນແຂວງບໍລິຄຳໄຊ ແມ່ນມີຄວາມເຊື່ອ, ນັບຖື ແລະ ມີວິຖີການດຳລົງຊີວິດຕິດພັນກັບພຸດທະສາສະໜາມາແຕ່ບູຮານນະການ ເຮັດໃຫ້ມີຄວາມຫຼາກຫຼາຍ ແລະ ອຸດົມສົມບູນທາງດ້ານວັດທະນະທຳ.

“ວັດດານ” ເປັນບ່ອນສັກກະລະບູຊາຂອງຊາວພຸດທະສາສະໜາມາໄດ້ຫຼາຍທົດສະຫວັດແລ້ວ, ໃນໄລ່ຍະເຂົ້າພັນສາ ຈະມີພໍ່ແມ່ປະຊາຊົນ, ເຖົ້າແກ່ບ້ານໃກ້ຄຽງ ແລະ ຕ່າງຖ່ິນ ຜູ້ທີ່ນັບຖືສາສະໜາ ມາໂຮມຊຸມນຸມຕັກບາດຢາດນ້ຳເປັນຈຳນວນຫຼວງຫຼາຍ ແລະ ໃນວັນປົກກະຕິກໍ່ຍັງມີນັກທ່ອງທ່ຽວ ມາຢ້ຽມຊົມຢ່າງປົກກະຕິກໍ່ເຊັ່ນດຽວກັນ ເພາະວ່າມີຄວາມສວຍງາຂອງທີວທັດທຳມະຊາດອ້ອມຂ້າງ ເປັນຕົ້ນແມ່ນດານຫີນອັນກ້ວາງໃຫ້ ເຊີ່ງປະກອບດ້ວຍຫິນທີ່ມີລັກສະນະຕ່າງໆເຊັ່ນ: ຮູບຫິນນາງເມລີ (ຄ້າຍກັບຮູບຜູ້ຍິງນອນທາງແຄງ), ຮູບຫີນຄູຄັນນາ, ຮູບຫິນຕຸ້ມນົກທາ, ຫິນໝານ້ອຍ ຈົນມີຄຳຕິດສົບຕິດປາກຂອງຜູ້ເຖົ້າຜູ້ແກ່ວ່າ: ” ຄູຄັນນາ ຕຸ້ມນົກທາ ໝາເຫົ່າເຕົ່າ, ສຳລັບຄວາມເປັນມາຂອງວັດດານຕາມຄຳບອກເລົ່າຂອງຜູ້ເຖົ້າຜູ້ແກ່ພາຍກໍ່ມີຢູ່ວ່າ:

ໃນລະຫວ່າງຊຸມປີ 1940-1950 ໄດ້ມີຍາພໍ່ອົງໜຶ່ງຊືວ່າ: ຍາພໍ່ໂສພາ ເຊີ່ງເປັນຜູ້ທຳອິດທີ່ມາອາໃສຢູ່ດານແຫ່ງນີ້. ຍ້ອນປະຊາຊົນຢູ່ແຖບນີ້ຕ້ອງການໃຫ້ມີພະອາຈານເພື່ອກາບໄວ້ບູຊາ ປະຊາຊົນບ້ານສອງຄອນ ຈຶ່ງຮ່ວມກັນສ້າງກຸດຕິໃຫ້ຢູ່ວັດນີ້ 1 ຫຼັງ, ແຕ່ຍ້ອນຄວາມຂາດເຂີນທາງດ້ານ ນ້ຳກິນ-ນ້ຳໃຊ້ ເພິ່ນຈຶ່ງຍ້າຍອອກໄປ. ຕໍ່ມາໃນລະຫວ່າງປີ 1.974-1.975 ພຣະຄູຜາລີ ເມື່ອເພີ່ນໄດ້ມາພົບດານແຫ່ງນີ້, ເພີ່ນຈຶ່ງໃຫ້ຄວາມເຫັນວ່າ: ຕໍ່ໜ້າດານແຫ່ງນີ້ຈະເປັນບ່ອນສູນກາງຂອງຄົນມາພັກພາອາໃສ, ເປັນທ່ຽວຊົມ ແລະ ບ່ອນມາພັກພ່ອນຢ່ອນໃຈ. ດັ່ງນັ້ນເພິ່ນຈຶ່ງຊັກຊວນຍາພໍ່ເຜີຍ ລະດົມປະຊາຊົນແຖບໄກ້ຄຽງມາສ້າງ ພະນາກປົກອົງໜຶ່ງຊື່ວ່າ: ເອກະນາຄາມຸດຈະລິນໂທໂຄ, ສ້າງຂຶ້ນໃນເດືອນຈຽງ ຂຶ້ນ 5 ຄ່ຳ ປີ ຄ.ສ. 1975 ແລະ ສຳເລັດໃນວັນທີ 17 ເດືອນຍີ່ ປີ ຄ.ສ.1975. ຫຼັງຈາກສຳເລັດແລ້ວ ຍາພໍ່ຜາລີ ກໍ່ມອບພະນາກປົກອົງນີ້ໃຫ້ແກ່ອຳນາດການປົກຄອງບ້ານເປັນຜູ້ປົກປັກຮັກສາ ແລະ ເພີ່ນກໍ່ໄດ້ອົບພະຍົບກັບຄືນເມືອງວຽງທອງຈົນເຖິງປະຈຸບັນນີ້.

ຕໍ່ມາຍ້ອນການນັບຖື, ສັກກາລະບູຊາ ຈຶ່ງມີການປັບປຸງ າງສາພັດທະນາວັດດານໃຫ້ມີຄວາມຈະເລີນຂື້ນເລື້ອຍໆມາ ຈົນເຖິງທຸກວັນນີ້ວັດດານປະກອບມີ: ພະນອນ 1 ອົງມີຄວາມຍາວ 15 ແມັດ, ກ້ວາງ 3 ແມັດ ສ້າງໂດຍຍາຖ່ານຫຼົງ ໃນປີ 1999, ຫໍພະ 5 ພະອົງສ້າງໂດຍ ຍາພໍ່ພຸດ ແລະ ຍາພໍ່ເລີດໃນວັນທີ່ 1/3/1996-10/2/1998, ພະມຸດຈະລິນໂທໂຄ ( ພະນາກປົກ ) 1 ອົງ, ຫໍກອງ 1 ຫຼັງ, ກຸດຕິ1 ຫຼັງ, ອາລາມ 1 ແຫ່ງ, ພະປາງຫ້າມຍາດ 1 ອົງ ແລະ ຫໍພະ 1 ຫຼັງ ນອກນີ້ຍັງມີກຸດຕິອີກຈຳນວນໜຶ່ງສຳລັບພະສາງສຳມະເນນ.

ແຫຼ່ງທີ່ມາຈາກhttp://bolikhamxay.gov.la

ຖໍ້າທ່ານ ສຸພານຸວົງ- ທ່ານ ໜູຮັກ ຖ້ຳປະຫວັດສາດທີ່ທ່ານຄວນຮູ້


ວັນນີ້ມາພົບກັບ ແອັດມິນນົກ ພາທ່ຽວ, ເຊິ່ງມື້ນີ້ຈະພາໄປທ່ຽວພາກເໜືອດິນແດນປະຫວັດສາດຢ່າງ ເມືອງວຽງໄຊ ແຂວງຫົວພັນ ທີ່ເປັນແຫຼ່ງທ່ອງທ່ຽວອັນສໍາຄັນຂອງລາວ, ເມືອງວຽງໄຊ ເປັນເມືອງນ້ອຍໆແຫ່ງໜຶ່ງ ທີ່ອ້ອມຮອບໄປດ້ວຍພູຜາສູງຊັນ ມີຖໍ້ານ້ອຍໃຫຍ່ຫຼາຍແຫ່ງເປັນດິນແດນທີ່ເປັນສູນກາງທີ່ເຂັ້ມແຂງຂອງການປະຕິວັດລາວ ເປັນສູນບັນຊາການ ແລະ ຖານທີ່ໝັ້ນຂອງກອງກຳລັງຮັກຊາດ ໄດ້ສ້າງສູນບັນຊາການຢູ່ພາຍໃນຖ້ຳ ສະໄໝຕໍ່ສູ້ກູ້ຊາດ ຊຶ່ງບັນດາທ່ານຜູ້ນຳຂອງຂະບວນການປະຕິວັດ ໄດ້ວາງແຜນ ແລະ ຊີ້ນຳນຳພາບັນຊາບັ້ນຮົບຕ່າງໆ ໃນທີ່ສຸດກໍສາມາດຍາດເອົາເອກະລາດຢ່າງສົມບູນມາສູ່ປະເທດຊາດ.


ວຽງໄຊໄດ້ເປັນທີ່ຮູ້ຈັກກັນໃນຖານະເປັນຖິ່ນກຳເນີດຂອງສາທາລະນະລັດ ປະຊາທິປະໄຕ ປະຊາຊົນລາວ ແລະ ເປັນແຫຼ່ງທ່ອງທ່ຽວທາງປະຫວັດສາດທີ່ສຳຄັນ ແລະມີຊື່ສຽງກ້ອງຊື່ລືນາມທົ່ວດິນແດນລາວ, ພາກພື້ນ ແລະ ສາກົນອີກແຫ່ງໜຶ່ງ, ໂດຍສະເພາະແມ່ນ ຖ້ຳຂອງອະດີດທ່ານຜູ້ນຳສຳຄັນຂອງລາວຫຼາຍທ່ານເຊັ່ນ: ທ່ານໄກສອນ ພົມວິຫານ, ທ່ານ ສຸພານຸວົງ, ທ່ານ ໜູຮັກ ພູມສະຫວັນ, ທ່ານ ພູມີ ວົງວິຈິດ, ທ່ານຄຳໄຕ ສີພັນດອນ, ທ່ານ ສີສະຫວາດ ແກ້ວບຸນພັນ, ທ່ານ ສີທົນ ກົມມະດຳ, ທ່ານ ໄຟດ່າງ ລຳເບຼຍຢາວ ແລະ ທ່ານ ພູນ ສີປະເສີດ ເປັນຕົ້ນ. ໃນນັ້ນ ບາງຖ້ຳຍັງບໍ່ທັນປັບປຸງດ້ານສະຖານທີ່ ແລະ ສິ່ງອຳນວຍຄວາມສະດວກເພື່ອຮອງຮັບການທ່ອງທ່ຽວເທື່ອ ເຊັ່ນ: ຖໍ້າທ່ານ ພູມີ ວົງວິຈິດ ຖໍ້າທ່ານໄຟດ່າງ ລໍເບຼຍຢາວ ຖໍ້າທ່ານສີທົນ ກົມມະດໍາ, ຖໍ້າທ່ານສີພອນ ລໍວັນໄຊ ຖໍ້າທູດຈີນ ແລະທ່ານຜູ້ນຳອື່ນໆ.




ດັ່ງນັ້ນ, ມື້ນີ້ແອັດມິນນົກ ຈະພາໄປທ່ຽວຖໍ້າ ທ່ານສຸພານຸວົງ ກັບ ທ່ານ ໜູຮັກ ພຸມສະຫວັນ ນໍາກັນເລີຍ
+ຖ້ຳທ່ານສຸພານຸວົງ
ຖ້ຳທ່ານສຸພານຸວົງ ຫຼື “ຖ້ຳປຸ່ງລວກໃຕ້” ຕັ້ງຢູ່ເທສະບານເມືອງວຽງໄຊເຊິ່ງທ່ານເຄີຍອາໄສຢູ່ໃນຖໍ້າແຫ່ງນີ້ ໃນໄລຍະປີ1964-1973 ແລະ ໃນເວລານັ້ນທ່ານສຸພານຸວົງໄດ້ດໍາລົງຕໍາແໜ່ງ ເປັນກົມການເມືອງສູນກາງພັກ ແລະ ປະທານແນວລາວຮັກຊາດ. ບໍລິເວນດ້ານຫນ້າຂອງຖ້ຳມີສວນຕົ້ນດອກຈຳປາ,ຕົ້ນໝາກກ້ຽງແລະຕົ້ນດອກໄມ້ທີ່ມີໃບສີແດງເຮື່ອງເຮືອໄປທົ່ວພື້ນດິນ ປຽບສະເໝືອນເລືອດຂອງປະຊາຊົນລາວທີ່ອາບຜືນແຜ່ນດິນລາວ. ທີ່ໂດດເດັ່ນໄປກວ່ານັ້ນກໍຄື ຢູ່ບໍລິເວນຖ້ຳແຫ່ງນີ້ແມ່ນມີຂຸມລະເບີດຂະໜາດໃຫຍ່ ທີ່ຖືກຕົບແຕ່ງເປັນອ່າງຮູບຫົວໃຈ


ຖ້ຳທ່ານ ໜູຮັກ ພູມສະຫວັນ
ຖ້ຳທ່ານ ໜູຮັກ ພູມສະຫວັນ ຕັ້ງຢູ່ເທສະບານເມືອງວຽງໄຊ ໂດຍທ່ານອາໄສຢູ່ໃນຖ້ຳແຫ່ງນີ້ໃນ ໄລຍະປີ 1964-1937 ແລະ ໄດ້ດຳລົງຕຳແໜ່ງເປັນກົມການເມືອງສູນກາງພັກ ແລະ ລັດຖະມົນຕີກະຊວງການເງິນ.